اسلام آباد: پی ٹی آئی کے رہنما اسد قیصر نے سانحہ جعفر ایکسپریس کے بعد وزیر دفاع خواجہ آصف سے استعفیٰ کا مطالبہ کردیا۔

پی ٹی آئی کے رہنما اسد قیصر نے قومی اسمبلی میں خواجہ آصف اور حکومت پر شدید تنقید کرتے ہوئے کہا کہ وزیر دفاع کے دماغ پر بلوچستان کے بجائے پی ٹی آئی سوار ہے، وزیر دفاع کو اپنے عہدے میں ناکامی کا اعتراف کرتے ہوئے استعفیٰ دینا چاہیے تھا۔

اسد قیصر نے حکومت پر الزام عائد کرتے ہوئے کہا کہ ملک میں آئین اور قانون کی حکمرانی نہیں، یہ جعلی پارلیمنٹ ہے۔ جعلی لوگ اسمبلی میں لائے گئے ہیں جو عوام کے نمائندے نہیں۔

انہوں نے فوری نئے انتخابات کا مطالبہ کرتے ہوئے کہا کہ ہم نے نئے انتخابات کا مطالبہ کیا تاکہ ملک میں آئین اور قانون کی حکمرانی قائم ہوسکے۔

بلوچستان کے عوام کے حقوق کے حوالے سے انہوں نے کہا کہ بلوچستان کے عوام کو حقوق نہیں ملے اور خارجہ پالیسی پر نظرثانی کرنا ہوگی جب کہ ایران اور افغانستان کے ساتھ آپ کے تعلقات ٹھیک نہیں ہیں۔

انہوں نے وزیر خارجہ خواجہ آصف کو تنقید کا نشانہ بناتے ہوئے کہا کہ جو کچھ ہو رہا ہے یہ آپ کی نااہلی کی وجہ سے ہو رہا ہے، ہمارے لیے سب سے پہلے پاکستان ہے اور ہم اداروں کو مضبوط دیکھنا چاہتے ہیں۔

سابق اسپیکر نے اپنے دور حکومت میں معیشت کی بہتری کا ذکر کیا اور کہا کہ ہمارے دور میں برآمدات میں اضافہ ہوا تھا اور وسط ایشیاء تک برآمدات کو فروغ دیا گیا تھا۔

اسد قیصر نے سندھ میں امن و امان کے مسئلے کی جانب بھی توجہ دلائی، خاص طور پر کراچی کی صورتحال پر اظہار افسوس کرتے ہوئے کہا کہ سندھ گیا تو وہاں تو لگتا ہے کہ کوئی حکومت ہی نہیں ہے اور کراچی کا انفرااسٹرکچر تباہ حال ہے۔

انہوں نے پی ٹی آئی کے بانی اور رہنما کے خلاف جھوٹے مقدمات اور غیرقانونی فیصلوں پر بھی اعتراض کیا اور کہا کہ مہنگائی کم ہونے کی بات کرنے والوں کو کراچی، لاہور اور اسلام آباد کے بازاروں میں آ کر دیکھنا چاہیے۔

آخر میں اسد قیصر نے حکومت کی جانب سے افغان مہاجرین کے خلاف کریک ڈاؤن کے فیصلے کو حمایت کی اور کہا کہ غیرقانونی مہاجرین کے خلاف کارروائی ہونی چاہیے۔