وزیراعلیٰ پنجاب مریم نوازشریف نے کہا کہ جنگلات کا وجود ماحول، معیشت اور شہریوں کیلئے لائف لائن  ہے۔

وزیراعلیٰ پنجاب مریم نواز نے جنگلات کے عالمی دن پر پیغام دیتے ہوئے کہا کہ عوام سے اپیل ہے کہ درخت ضرور لگائیں، چاہے اس کے سائے میں بیٹھنے کی توقع ہونہ ہو، بچے اپنے والدین اور اساتذہ کرام کے نام پر درخت لگائیں۔

 مریم نواز نے کہا کہ  حکومت ماحولیاتی آلودگی کو ختم کرنے اور آنے والی نسلوں کو  صاف ستھرا ماحولیاتی نظام دینے کیلئے پرعزم ہے، موسمیاتی تبدیلی کے اثرات سے نمٹنے کے لیے شجرکاری ناگزیر  ہیں، درخت لگائیں اور سموگ کے اندھیرے مٹائیں۔

انہوں نے یہ بھی کہا کہ عالمی یوم جنگلا ت پرصوبے بھر میں 15لاکھ پودے لگائے جائیں گے، موسم بہار شجرکاری مہم کے دوران مجموعی طور پر ڈیڑھ کروڑ پودے لگانے کا ٹارگٹ دیا گیا ہے، وزیراعلیٰ ”پلانٹ فار پاکستان“ مہم کے تحت 44لاکھ پودے لگائے جائیں گے۔

مریم نواز کا یہ بھی کہنا تھا کہ ”گرین پاکستان“ پروگرام کے تحت 34لاکھ سے زائد پودے لگائے جائیں گے۔صوبہ بھر کے زرعی جنگلات میں 14 لاکھ زائدپودے لگائے جائیں گے، ہیلتھ، ایجوکیشن اور دیگر اداروں کو شجرکاری کے لیے 55لاکھ پودے فراہم کیے گئے ہیں۔

انہوں نے کہا کہ پہلی مرتبہ بے آباد سرکاری اراضی پر بھی درخت لگائے جائیں گے، راجن پور، مظفرگڑھ اور سرگودھا میں دریائے سندھ سے متصل 3700 ایکڑ پر شجرکاری کی جائیگی، غازی گھاٹ اورمظفر گڑھ میں 1500ایکڑ رقبے پر شجرکاری ہوگی، شیخوپورہ اور لاہور راوی کنارے پر 444 ایکڑ رقبے پر درخت لگائے جائیں گے، گجرات میں دریائے چناب سے متصل علاقوں میں بھی شجرکاری ہوگی، گوجرانوالہ، چھانگا مانگا، چیچہ وطنی، اٹک، جھنگ اور ڈی جی خان میں خالی اراضی پر  شجرکاری کی جائے گی۔

مریم نواز کا کہنا تھا کہ پنجاب میں 161 سال سے قائم محکمہ جنگلات کو انفارمیشن ٹیکنالوجی سے لیس کیا جارہا ہے، فارسٹ ڈیپارٹمنٹ میں جی آئی ایس ریموٹ سینسنگ، ہائی ریزولوشن میپنگ اور ڈرون ٹیکنالوجی متعارف کروائی گئی ہے۔

انہوں نے یہ بھی کہا کہ سیٹلائٹ اور ڈورن ٹیکنالوجی سے جنگلات میں وقوع پذیر تبدیلیوں کی بروقت نشاندہی ممکن ہوگی، مری اور جھانگا مانگا کے جنگلات کی ہائی ریزولوشن اورتھری ڈی میپنگ مکمل کرلی گئی ہے، ڈرون ٹیکنالوجی سے جنگلات میں تجاوزات کی مانیٹرنگ اور فارسٹ ہیلتھ مانیٹرنگ ممکن ہوگی، جنگلات اور جنگلی حیات کی حفاظت کے لیے تھرمل سینسرکی مدد لی جائے گی۔

 مریم نواز نے کہا کہ جنگلات کی حدود کے تعین کے لیے کمپارٹمنٹ لیول فارسٹ میپنگ کی جارہی ہے، فارسٹ ڈیپارٹمنٹ کے فیلڈ اسٹاف کی مانیٹرنگ اور انسپیکشن کے لیے موبائل ایپ لانچ کی گئی ہے، جنگلا ت میں لگنے والی آگ کے بروقت سدباب اور ڈی ٹیکشن انٹیلی جنس سسٹم کوجلد فعال کر دیا جائے گا، جنگلات سے متعلق ہنگامی صورتحال کے لیے خصوصی ہیلپ لائن 1084 بھی قائم کر دی گئی ہے۔