اسلام آباد: وزیراعظم شہباز شریف نے پیٹرولیم مصنوعات کی قیمتیں برقرار رکھنے کا فیصلہ کیا ہے۔

وزیراعظم نے پیٹرولیم مصنوعات کی قیمتوں کو حالیہ سطح پر برقرار رکھنے کا فیصلہ کیا ہے تاکہ اس کا پورا مالی فائدہ بجلی کی قیمتوں میں کمی کے ذریعے عوام کو منتقل کیا جاسکے۔

وزیراعظم نے اس اقدام کو ایک اہم حکومتی فیصلہ قرار دیتے ہوئے کہا کہ یہ اقدام بجلی کی قیمتوں میں بامعنی کمی کا باعث بنے گا۔

وزیراعظم کا کہنا تھا کہ بجلی کے نرخوں میں کمی کے حوالے سے ایک جامع اور مؤثر حکمت عملی تیار کی جا رہی ہے جس کی تفصیلات آئندہ چند ہفتوں میں قوم کے سامنے آئیں گی۔

انہوں نے یہ بھی کہا کہ عالمی منڈی میں تیل کی قیمتوں میں ردوبدل کے فرق سے پیدا ہونے والی مالی گنجائش اور دیگر اقدامات سے عوام کو بجلی کے نرخوں میں بڑا ریلیف ملے گا۔

وزیراعظم نے عوامی ریلیف کو اپنی حکومت کی اولین ترجیح قرار دیتے ہوئے کہا کہ یہ پیکج نہ صرف بجلی کی قیمتوں میں کمی لائے گا بلکہ مہنگائی پر بھی اس کا مثبت اثر پڑے گا۔

وزیراعظم نے اس بات کا عزم ظاہر کیا کہ آئندہ چند ہفتوں میں بجلی کے نرخوں میں کمی کے پیکج کا اعلان کیا جائے گا جس سے عوام کو مزید سہولتیں ملیں گی۔

وزیراعظم نے مزید کہا کہ اس ریلیف سے مجموعی طور پر عوام کی مشکلات میں کمی آئے گی اور وہ جلد قوم کو اس بارے میں آگاہ کریں گے۔