لاہور: وزیر اطلاعات عظمیٰ بخاری نے دہشت گردی کا مقابلہ کرنے کے لیے قوم سے متحد ہونے کی اپیل کردی۔

صوبائی وزیر اطلاعات عظمیٰ بخاری نے پنجاب اسمبلی کے باہر میڈیا سے گفتگو کرتے ہوئے کہا کہ دہشت گردی کا مقابلہ کرنے کے لیے قوم کو متحد ہونا ہوگا۔

انہوں نے کہا کہ جہاں تحریک انصاف کا فسادی ٹولہ بیٹھا ہو، جو نہ تو دہشت گردی کی مذمت کرے اور نہ ہی اپنی فوج پر حملہ آور ہو، وہاں اتحاد قائم کرنا مشکل ہے۔

عظمیٰ بخاری نے اس بات پر زور دیا کہ ملک میں امن و امان کی صورتحال کو بہتر بنانے کے لیے ایک نیا نیشنل ایکشن پلان بنانے کی ضرورت ہے اور وزیراعظم نے اس معاملے کو اچھے طریقے سے ٹیک اپ کیا ہے۔

خیبر پختونخوا (کے پی) میں ہونے والے حالیہ دھماکے کے حوالے سے صوبائی وزیراطلاعات نے کہا کہ اللہ پاک سب کی حفاظت کرے اور حالات نازک ہیں۔ ہمیں ایک شخص کو بچانے کی بجائے پورے ملک کو بچانے کی بات کرنی چاہیے۔

عظمیٰ بخاری نے تحریک انصاف پر تنقید کرتے ہوئے کہا کہ ملک سب کا ہے اور تحریک انصاف کو اپنے قیدی کی بجائے خیبر پختونخوا کے عوام کا خیال رکھنا چاہیے جب کہ امن و امان برقرار رکھنا صوبائی حکومتوں کی ذمہ داری ہے اور وہ اس سے نہیں بھاگ سکتے۔

صوبائی وزیراطلاعات نے مزید کہا کہ پی ٹی آئی کے باقی ارکان حکومت کے ساتھ بات چیت کر سکتے ہیں، مگر مجرموں کو حکومت کے ساتھ نہیں بٹھایا جاسکتا۔ خیبر پختونخوا کی حکومت اس وقت افغانستان میں وفود بھیجنے میں مصروف ہے۔

عظمیٰ بخاری نے قومی اسمبلی کے کل اجلاس کا ذکر کرتے ہوئے کہا کہ پی ٹی آئی کی طرف سے ایک مذمت کا لفظ بھی نہیں بولا گیا جب کہ اسمبلی میں موجود پی ٹی آئی کے ارکان کو بلوچستان لبریشن آرمی (بی ایل اے) کے خلاف بولنا چاہیے تھا۔