وزیراعظم محمد شہباز شریف نے کہا کہ پاکستان ماحولیاتی تبدیلی سے متاثرہ ممالک کی صف اول میں کھڑا ہے۔

وزیراعظم محمد شہباز شریف نے گلیشیئرز کے عالمی دن کے موقع پر پیغام دیتے ہوئے کہا کہ2025  میں ہم دنیا کا پہلا گلیشیئرز کا دن منا رہے ہیں۔

شہباز شریف نے کہا کہ گلیشیئرز کرہ ارض پر زندگی کی ضمانت ہیں جو ماحولیاتی نظام کو قدرتی انداز سے برقرار رکھتے ہیں اور اہم قدرتی وسائل بالخصوص صاف پانی کی فراہمی یقینی بناتے ہیں۔

وزیراعظم نے کہا کہ آج کے دن ہم صاف پانی کے ان اہم ذخائر کی حفاظت کیلئے فوری اقدامات کی ضرورت کو تسلیم کرتے ہیں۔

شہباز شریف کا کہنا تھا کہ پاکستان میں 13,000 سے زائد گلیشیئرز موجود ہیں، یہ تعداد زمین کے قطبی خطوں کے بعد کسی بھی جگہ گلیشیئرز کی پائی جانے والی سب سے زیادہ تعداد ہے۔

وزیراعظم نے کہا کہ ماحولیاتی تبدیلی کی وجہ سے بدلتے موسموں اور بڑھتے ہوئے اوسط درجہ حرارت کی وجہ سے 10,000 سے زائد گلیشیئرز تیزی سے کم ہو رہے ہیں، نتیجتاً سیلاب اور خشک سالی کی بدولت دریاؤں، زراعت اور ان سے جڑے لاکھوں لوگوں کے روزگار کو  خطرات لاحق ہیں، اسی وجہ سے ہزاروں نئی جھیلیں معرض وجود میں آئی ہیں جن میں بیسیوں تباہ کن سیلاب کے خطرے سے دوچار ہیں۔

شہباز شریف نے یہ بھی کہا کہ 2022  کے سیلاب نے یہ واضح کر دیا کہ پاکستان ماحولیاتی تبدیلی کے شدید خطرات کا سامنا کر رہا ہے، جس نے ندی نالوں و دریاؤں کے گرد آبادیوں اور میدانی علاقوں میں شدید تباہی مچائی اور مجموعی طور پر 30 بلین امریکی ڈالر کا معاشی نقصان پہنچایا۔

وزیر اعظم کا کہنا تھا کہ سب سے زیادہ متاثرہ ممالک میں سے ایک کے طور پر، پاکستان کو گلیشیئرز کی مانیٹرنگ کے پروگرام، قبل از وقت پیش گوئی کے نظام، ماحولیاتی تبدیلی کے مضر اثرات سے محفوظ زرعی طریقوں کو اپنانے، اور پانی ذخیرہ کرنے کے متبادل حل میں سرمایہ کاری کے لیے مزید تعاون کی ضرورت ہے۔

شہباز شریفنے مزید یہ بھی کہا کہ ہمیں بین الاقوامی سطح پر مشترکہ ماحولیاتی سیاحت کے رہنما خطوط کو فروغ دینے کی بھی ضرورت ہے جو زہریلے مادوں اور آلودگی کو ان قیمتی اثاثوں کو تباہ کرنے سے روکے، آئیے ہم سب مل کر گلیشیئرز کے تحفظ کیلئے عملی اقدامات اٹھائیں، کیونکہ اگر گلیشیئر ختم ہوگئے تو ان سے منسلک زندگیاں بھی تباہ ہونے کا خطرہ ہے۔