اسلام آباد: قومی ادارہ برائے لوک و روایتی ورثہ کی جانب سے سانحہ جعفر ایکسپریس کے ہیروز کو خراجِ تحسین پیش کرنے کے لیے پینٹنگ مقابلے کا انعقاد کیا گیا۔

قومی ادارہ برائے لوک و روایتی ورثہ (لوک ورثہ) نے 26 مارچ 2025 کو پاکستان میوزیم آف ایتھنالوجی ہال آف ایگزیبیشنز میں ایک پُرخلوص پینٹنگ مقابلے کا انعقاد کیا۔

اس ایونٹ کا مقصد جڑواں شہروں کے یونیورسٹی اور کالج کے طلبہ کو جعفر ایکسپریس ٹرین سانحے کے ہیروز سے اظہار یکجہتی کا موقع فراہم کرنا تھا۔

یہ مقابلہ نوجوان فنکاروں کی تخلیقی صلاحیتوں کو اجاگر کرنے اور حادثے کے متاثرین کی ہمت اور استقامت کو خراجِ تحسین پیش کرنے کے لیے ترتیب دیا گیا تھا۔

شرکاء نے اپنی فنکارانہ مہارتوں کا بھرپور مظاہرہ کیا اور اپنی پینٹنگز کے ذریعے بہادری، یکجہتی اور قومی فخر جیسے موضوعات کو اجاگر کیا۔

لوک ورثہ کے ایگزیکٹو ڈائریکٹر مظفر علی برکی نے اپنے خطاب میں فن کے ذریعے قومی ہیروز اور ثقافتی یکجہتی کو اجاگر کرنے کی اہمیت پر روشنی ڈالی۔

شاندار کارکردگی دکھانے والے فاتحین کو نقد انعامات اور اسناد دی گئیں تاکہ ان کی محنت اور تخلیقی صلاحیتوں کو سراہا جا سکے۔ مقابلے کا دوسرا مرحلہ عید کی تعطیلات کے بعد منعقد کیا جائے گا۔

خیال رہے کہ یہ منصوبہ پاکستان کے ثقافتی ورثے کے فروغ اور جدید چیلنجز کے تخلیقی حل کے حوالے سے لوک ورثہ کے عزم کی عکاسی کرتا ہے۔

ادارہ نہ صرف نوجوان ٹیلنٹ کی نشوونما کے لیے کام کر رہا ہے بلکہ معاشرتی ہم آہنگی کو فروغ دینے میں بھی اہم کردار ادا کر رہا ہے۔