وزیراعظم نے 20 ارب روپے کے رمضان ریلیف پیکج 2025 کا اجراء کردیا ہے جس سے 40 لاکھ خاندان اور2کروڑ افراد مستفید ہوں گے۔

وزیراعظم شہباز شریف نے اسلام آباد میں رمضان پیکج 2025 کی افتتاحی تقریب سے خطاب کرتے ہوئے کہا کہ رمضان پیکج سے چاروں صوبوں کے مستحق خاندان مستفید ہوں گے، اس بار رمضان پیکج میں شفافیت کو یقینی بنایاجائےگا۔

وزیراعظم نے کہا کہ اس بار رمضان پیکج کوانتہائی آسان بنایا ہے، اب لمبی قطاروں میں نہیں کھڑا ہونا پڑےگا، پیکج سے آزادکشمیر،گلگت بلتستان کے مستحق خاندان بھی مستفیدہوں گے۔

شہباز شریف نے کہا کہ محصولات میں اضافے اور معاشی بہتری کے لیے مربوط اقدامات جاری ہیں، گزشتہ سال 7 ارب کے رمضان پیکج کے مقابلے اس بار3گنابڑھایا ہے، جبکہ گزشتہ رمضان کے مقابلے اس بار مہنگائی کی شرح میں نمایاں کمی ہے۔

وزیراعظم نے کہا کہ 40 لاکھ مستحق خاندانوں کو ڈیجیٹل والٹ کے ذریعے 5 ہزار دیے جائیں گے۔

 شہباز شریف نے رمضان پیکج کی افتتاحی تقریب سے خطاب کرتے ہوئے یہ بھی کہا کہ مدرسہ حقانیہ میں دہشتگردی کے حملےکی مذمت کرتےہیں، گزشتہ روز نوشہرہ میں دہشتگردی کا افسوسناک واقعہ پیش آیا۔

وزیراعظم کا یہ بھی کہنا تھا کہ ملک سے دہشتگردی کے ناسور کا خاتمہ کرکےدم لیں گے، دہشتگردی کے نتیجے میں مولانا حامدالحق و دیگر پاکستانی شہید ہوئے، یقین ہے کے پی حکومت فوری قاتل دہشتگردوں کا احاطہ کے گی، دہشتگردی کے ناسور کو دفن کرنے تک چین سے نہیں بیٹھیں گے۔

شہباز شریف نے کہا کہ ماضی میں بھی ہم نےدہشتگردی کاخاتمہ کیا، دہشتگردی کے خلاف جنگ میں80  ہزار پاکستانیوں نے قربانیاں دیں، ہر طبقہ فکر کے لوگوں نے دہشتگردی کے خاتمے کے لیے جان کے نذرانے پیش کیے۔

وزیراعظم نے یہ بھی کہا کہ حالیہ برسوں میں ہونیوالی دہشتگردی کی وجوہات سب جانتے ہیں، کرپشن کے ذریعے غریبوں کا پیسہ لوٹا گیا، اس بار رمضان پیکج میں شفافیت کو یقینی بنایا جائے گا۔