اسلام آباد: مالی سال 2022- 23 کے اثاثے اور گوشواروں کی تفصیلات جمع نہ کروانے کے معاملے پر الیکشن کمیشن نے قومی اسمبلی کے 10 سابق ارکان، سندھ اسمبلی کے 7 اور بلوچستان اسمبلی کے 7 سابق ممبران کو نااہل قرار دے دیا۔

الیکشن کمیشن آف پاکستان نے اثاثوں کی تفصیلات جمع نہ کروانے سے متعلق کیس کا فیصلہ جاری کر دیا۔

فیصلے کے مطابق سابق ارکان قومی اور صوبائی اسمبلی  تفصیلات جمع کروانے تک عام انتخابات، ضمنی انتخابات اور سینیٹ الیکشن میں حصہ نہیں لے سکیں گے، مالی سال 2022 23 کے اثاثوں کی تفصیلات کے فارم بی جمع نہ کروانے تک یہ ارکان نااہل رہیں گے۔

الیکشن کمیشن نے اپنے فیصلے میں کہا کہ تحلیل قومی اسمبلی کے سابق ارکان خرم دستگیر خان، محسن نواز رانجھا، محمد عادل، رانا محمد اسحاق خان، کمال الدین، عصمت اللہ، ثمینہ مطلوب، نصیبہ، شمیم آرا پنور اور روبینہ عرفان کو نااہل قرار دے دیا گیا ہے۔

اس کے علاوہ الیکشن کمیشن نے تحلیل صوبائی اسمبلی سندھ کے سابق رکن عدیل احمد، حزب اللہ بھگیو کو بھی نااہل قرار دے دیا جبکہ سابق ارکان سندھ اسمبلی ارسلان تاج حسین، عارف مصطفیٰ جتوئی، عمران علی شاہ، علی غلام اور طاہرہ کو بھی نااہل قرار دے دیا گیا۔

فیصلے میں مزید بتایا گیا کہ الیکشن کمیشن کی جانب سے بلوچستان اسمبلی کے سابق ارکان میر سکندر علی، میر محمد اکبر، سردار یار محمد رند، عبدالرشید، عبدالواحد صدیقی، میر حمال اور بی بی شاہینہ کو بھی نااہل قرار دے دیا گیا۔