اسلام آباد: وزیرِ اعظم شہباز شریف کا خواتین کے عالمی دن کے موقع پر خواتین کو باوقار روزگار اور اپنے کاروبار کے ذریعے بااختیار بنانے کے حوالے سے بڑا اقدام سامنے آگیا۔

وزیرِ اعظم محمد شہباز شریف کی زیر صدارت سمال اینڈ میڈیم اینٹرپرائز ڈویلپمنٹ اتھارٹی (SMEDA)  کے تحت جاری اصلاحات پر ایک اہم جائزہ اجلاس منعقد کیا گیا۔

اجلاس میں خواتین کی معاشی ترقی اور کاروباری خودمختاری کے حوالے سے اہم فیصلے کیے گئے۔ وزیرِ اعظم نے خواتین کے عالمی دن کے موقع پر خواتین کو باوقار روزگار اور اپنے کاروبار کے ذریعے با اختیار بنانے کے لیے بڑا اقدام کیا۔

خواتین کو اسمال اینڈ میڈیم اینٹرپرائز سیکٹر (SME) میں شامل کرنے کا فیصلہ

وزیرِ اعظم نے فیصلہ کیا کہ گھریلو صنعت و چھوٹے کاروبار سے منسلک خواتین کو اسمال اینڈ میڈیم اینٹرپرائز (SME) سیکٹر میں شامل کیا جائے گا تاکہ وہ اپنے کاروبار میں اضافہ کرسکیں۔

اس کے علاوہ وزیرِ اعظم نے گھریلو صنعت سے منسلک کاروباری خواتین کو کاروبار میں اضافے کے لیے ضروری سرمائے اور سہولتیں ترجیحی بنیادوں پر فراہم کرنے کی ہدایت کی۔

یوتھ لون اسکیم کے ذریعے خواتین کو کم لاگت قرضوں کی فراہمی

وزیرِ اعظم نے یوتھ لون اسکیم کے تحت خواتین کو کم لاگت قرضوں کی فراہمی کے لیے اقدامات کی ہدایت کی تاکہ خواتین اپنے کاروبار کو بہتر بنا سکیں۔

اس کے ساتھ ہی انہوں نے دیہی و دور دراز علاقوں میں تعلیم یافتہ اور ہنر مند خواتین کو اپنے کاروبار سے با اختیار بنانے کے لیے اقدامات کرنے کی ہدایت بھی دی۔

گھریلو صنعت سے منسلک خواتین کے لیے تربیتی مراکز قائم کرنے کی ہدایت

وزیرِ اعظم نے گھریلو صنعت سے منسلک خواتین کے کاروبار میں اضافے کے لیے انہیں ضروری تربیت فراہم کرنے کی ہدایت کی اور اس مقصد کے لیے سہولت مراکز قائم کرنے کا فیصلہ کیا۔

شہباز شریف نے کہا کہ ان مراکز تک خواتین کی رسائی کو یقینی بنانے کے لیے اقدامات کیے جائیں گے تاکہ وہ اپنی صلاحیتوں کو مزید بہتر کر سکیں۔

کمیٹی قائم، جامع لائحہ عمل پر سفارشات جلد وزیرِ اعظم کو پیش کی جائیں گی

وزیرِ اعظم نے گھریلو و چھوٹے پیمانے پر کاروبار سے منسلک خواتین کو با اختیار بنانے کے حوالے سے ایک جامع لائحہ عمل مرتب کرنے کے لیے کمیٹی قائم کی۔

کمیٹی خواتین کو اپنے کاروبار کے ذریعے با اختیار بنانے کے لیے ضروری اقدامات پر سفارشات تیار کرے گی جو وزیرِ اعظم کو جلد پیش کی جائیں گی۔

پاکستان کی نصف آبادی خواتین پر مشتمل، حکومت خواتین کی معاشی خود مختاری کے لیے پُرعزم

وزیرِ اعظم نے اس موقع پر کہا کہ پاکستان کی تقریباً نصف آبادی خواتین پر مشتمل ہے اور حکومت خواتین کو با اختیار اور معاشی طور پر مستحکم کرنے کے لیے ترجیحی بنیادوں پر اقدامات کر رہی ہے۔ حکومت خواتین کو باوقار روزگار اور کاروبار کی فراہمی کے لیے تمام تر ضروری وسائل اور تربیت فراہم کرے گی۔

وزیرِ اعظم کو SMEDA کے تحت مائیکرو، اسمال اور میڈیم اینٹرپرائزز کی ترقی کے حوالے سے بریفنگ

اجلاس میں وزیرِ اعظم کو سمیڈا کے تحت مائیکرو، اسمال اور میڈیم اینٹرپرائزز کی ترقی کے لیے کیے جانے والے اقدامات پر بریفنگ دی گئی۔

اجلاس میں وفاقی وزراء ڈاکٹر مصدق ملک، احد خان چیمہ، شزہ فاطمہ خواجہ، معاون خصوصی ہارون اختر، چیئرمین وزیرِ اعظم یوتھ پروگرام رانا مشہود احمد خان اور متعلقہ اعلیٰ حکام نے شرکت کی۔