وفاقی وزیر ریلوے محمد حنیف عباسی نے میڈیا سے گفتگو کرتے ہوئے کہا کہ جعفر ایکسپریس پر ہونے والے حملے کا جواب ہم نے آج پشاور سے ٹرین دوبارہ چلا کر دیا ہے۔

انہوں نے بتایا کہ ریلوے میں بہت جلد اچھے منصوبوں کا آغاز عید کے بعد کیا جائے گا۔

بلوچستان میں حالیہ حالات پر تشویش کا اظہار کرتے ہوئے وزیر ریلوے نے کہا کہ ہمارے شہداء نے ہمیشہ اپنے خون سے اس ملک کا تحفظ کیا ہے، اور ہم دشمن اور بیرونی سازشوں کو کبھی اس ملک میں کامیاب نہیں ہونے دیں گے۔

محمد حنیف عباسی نے کہا کہ جعفر ایکسپریس پر استعمال ہونے والے ہتھیار جدید اور مہنگے تھے، جن کا استعمال صرف انسانی جانوں کے ضیاع کے لیے کیا گیا۔

وزیر ریلوے نے مزید کہا کہ ملک میں فرقہ واریت اور لسانیت جیسی سازشیں دشمن کی طرف سے کی جاتی رہی ہیں، لیکن ہم نے ہمیشہ متحد ہو کر انہیں ناکام بنایا ہے۔

جعفر ایکسپریس پر ہونے والے حملے کے بعد ہم نے ٹریک کی مرمت کر کے دو دن کے اندر دوبارہ بحال کر لیا۔

وفاقی وزیر نے ریلوے کے خسارے پر بھی بات کی اور کہا کہ ریلوے کا موجودہ خسارہ پینشن کی وجہ سے بڑھ رہا ہے۔

انہوں نے حکومت سے مطالبہ کیا کہ پینشن کا بوجھ اٹھا کر پیسہ ریلوے کو فراہم کیا جائے تاکہ ادارہ اپنے پیروں پر کھڑا ہو سکے۔

حنیف عباسی نے مزید کہا کہ اس وقت ریلوے صرف ڈیڑھ سو کنٹینر اٹھا رہا ہے، اور ہم عوام سے درخواست کرتے ہیں کہ اپنی ویگن لے کر ہمارے ساتھ چلیں۔

انہوں نے ریلوے پولیس کی استعداد کار پر بھی بات کرتے ہوئے کہا کہ ریلوے پولیس کے گریڈ کو پنجاب پولیس کے برابر کر دیا گیا ہے اور 1500 افراد کی بھرتی کرنے جا رہے ہیں۔

تاہم، انہوں نے یہ بھی تسلیم کیا کہ ریلوے پولیس کے پاس نہ تو مناسب ٹریننگ ہے اور نہ ہی مطلوبہ صلاحیت۔

وزیر ریلوے کا کہنا تھا کہ ہمیں ریلوے کے معاملات کی بہتری کے لیے تمام ضروری اقدامات اٹھانے ہوں گے تاکہ اس ادارے کو مالی طور پر مستحکم کیا جا سکے۔