صدر مملکت آصف علی زرداری کی زیر صدارت بلوچستان میں امن و امان کی صورتحال پر ایک اہم اجلاس منعقد کیا گیا، جس میں چئیرمین پاکستان پیپلزپارٹی بلاول بھٹو زرداری نے خصوصی شرکت کی۔

اجلاس میں وزیر اعلیٰ بلوچستان میر سرفراز بگٹی نے صوبے کی موجودہ امن و امان کی صورتحال پر بریفنگ دی۔

اجلاس سے خطاب کرتے ہوئے صدر مملکت آصف علی زرداری نے کہا کہ دہشت گرد عناصر کو ہر قیمت پر شکست دی جائے گی، اور ان کا مقصد قوم کو تقسیم کرنا ہے، لیکن ریاست نے عزم کر رکھا ہے کہ دہشت گردی کے خلاف جنگ میں کامیابی حاصل کرنی ہے۔

انہوں نے مزید کہا کہ دہشت گردی کے خاتمے کے لیے انسداد دہشت گردی ونگ کو جدید اسلحہ فراہم کیا جائے گا، تاکہ ان کی کارروائیوں کا مؤثر مقابلہ کیا جا سکے۔

صدر مملکت نے بلوچستان کو اپنی دل کی زمین قرار دیتے ہوئے کہا کہ صوبے کی ترقی اور پائیدار امن کا حصول ہماری ترجیحات میں شامل ہے۔

صدر مملکت آصف علی زرداری نے مزید کہا کہ ہم بلوچستان کے ہر بچے کو اسکول میں دیکھنا چاہتے ہیں اور وقت کی ضرورت ہے کہ ہم جدید ٹیکنالوجی کے ذریعے بچوں کو تعلیمی میدان میں آگے بڑھنے کا موقع دیں۔

اجلاس میں قائم مقام گورنر بلوچستان کیپٹن ریٹائرڈ عبدالخالق اچکزئی، چیف سیکرٹری بلوچستان شکیل قادر خان، آئی جی پولیس معظم جاہ انصاری اور دیگر اعلیٰ حکام نے بھی شرکت کی۔