محکمہ انسداد دہشت گردی (سی ٹی ڈی) نے دہشت گردی کے خدشات کے پیش نظر پنجاب کے مختلف شہروں میں 166 انٹیلی جنس بیسڈ آپریشنز (IBOs) کیے، جن کے دوران 11 دہشت گرد گرفتار کر لیے گئے۔

ترجمان سی ٹی ڈی کے مطابق کارروائیاں سرگودھا، راولپنڈی، پاک پتن، گجرات، چکوال، بہاولپور، بہاول نگر اور فیصل آباد میں کی گئیں، جبکہ میانوالی سے کالعدم تحریک طالبان پاکستان (TTP) کے ایک خطرناک دہشت گرد کو بارودی مواد سمیت گرفتار کیا گیا۔

ترجمان کے مطابق دہشت گردوں کے قبضے سے بارودی مواد، آئی ای ڈی بم، دو ڈیٹونیٹر، 19 حفاظتی فیوز تار، 26 فٹ پمفلیٹ، نقدی اور پرائمہ کارڈ برآمد کیے گئے ہیں۔

سی ٹی ڈی کے مطابق گرفتار دہشت گردوں کی شناخت حیدر سلطان، ولی رحمان، زبیر، امین، اکبر، مقصود خان، عمیر، ظفر اقبال، ابراہیم قاسمی، محب اللہ اور صدام حسین کے ناموں سے ہوئی ہے۔

دہشت گرد مختلف مقامات پر کارروائی کرکے عوام میں خوف و ہراس پھیلانے کا منصوبہ بنا رہے تھے۔

ترجمان سی ٹی ڈی نے مزید بتایا کہ گزشتہ ایک ہفتے کے دوران 1475 کومبنگ آپریشنز کیے گئے، جن میں 61603 افراد سے پوچھ گچھ کی گئی، جبکہ 422 مشتبہ افراد کو گرفتار کیا گیا۔

سی ٹی ڈی حکام کا کہنا ہے کہ پنجاب کو محفوظ بنانے کے ہدف پر عمل پیرا ہیں اور دہشت گردی کے ناسور کو جڑ سے اکھاڑ پھینکنے کے لیے پرعزم ہیں۔