لاہور: وزیراطلاعات پنجاب عظمیٰ بخاری نے خواتین کے حقوق کے لیے پنجاب حکومت کے اقدامات کا اعلان کردیا۔

لاہور میں صوبائی وزیراطلاعات عظمیٰ بخاری نے میڈیا سے گفتگو کرتے ہوئے خواتین کے حقوق کے لیے پنجاب حکومت کی جانب سے کیے جانے والے متعدد اقدامات پر روشنی ڈالی۔

انہوں نے کہا کہ شہر سے باہر کام کرنے والی خواتین کے لیے ہاسٹل بنائے جارہے ہیں تاکہ انہیں بہتر رہائش فراہم کی جاسکے۔

عظمیٰ بخاری نے بتایا کہ دیہات کی خواتین کے لیے لائیو اسٹاک کارڈ بھی متعارف کرایا گیا ہے جس سے خواتین کو زرعی شعبے میں مزید فوائد حاصل ہوں گے۔

انہوں نے یہ بھی بتایا کہ اس کے علاوہ دھی رانی پروگرام کے تحت 15 ہزار بچیوں کی شادی کرائی گئی ہے اور اس پروگرام کا دوسرا مرحلہ بھی جلد شروع ہوگا۔

صوبائی وزیراطلاعات کا کہنا تھا کہ مریم نواز نے کہا ہے کہ بچوں اور خواتین پر تشدد ان کی ریڈ لائن ہے اور اسی بنیاد پر پنجاب حکومت نے خواتین کے حقوق کے تحفظ کے لیے کئی اقدامات کیے ہیں۔

عظمیٰ بخاری نے یہ بھی کہا کہ خواتین اب اپنے اوپر ہونے والے ظلم کے خلاف آواز اٹھا رہی ہیں اور تشدد کی شکار خواتین کو قانونی معاونت فراہم کی جائے گی۔

انہوں نے مزید بتایا کہ خواتین سے تیزاب گردی اور زیادتی کے ملزمان 24 سے 48 گھنٹوں میں گرفتار کیے جاتے ہیں اور اس حوالے سے پنجاب حکومت خواتین کی معاونت کے لیے خصوصی سیل بنانے جا رہی ہے تاکہ ان کی شکایات کا فوری طور پر ازالہ کیا جاسکے۔