اسلام آباد: پاک امریکہ تعلقات کے حوالے سے ریاستی سطح پر ایک اور مثبت پیش رفت سامنے آئی ہے۔

امریکی ریاست ٹیکساس میں 23 مارچ کو یوم پاکستان کے طور پر تسلیم کرنے کی قرارداد منظور کرلی گئی ہے، قرارداد میں پاکستانی نژاد امریکی کمیونٹی کی ریاست ٹیکساس میں سماجی، مذہبی، لسانی اور معاشی خدمات کا بھی اعتراف کیا گیا۔

نیو یارک کی ریاستی اسمبلی کی جانب سے گزشتہ دنوں یوم پاکستان اور پاکستان بزنس ڈے کے حوالے سے دو قراردادیں منظور کی گئی۔

سفیر پاکستان رضوان سعید شیخ نے ٹیکساس اسمبلی کی جانب سے یوم پاکستان کے حوالے سے قرارداد منظور کرنے کا خیر مقدم کیا اور کہا کہ مختلف ریاستوں میں یوم پاکستان کے حوالے سے قراردادوں کی منظوری ریاستی سطح پر پاک امریکہ تعلقات خصوصاً معاشی تعلقات کے فروغ کے حوالے سے انتہائی حوصلہ افزا پیش رفت ہے۔

پاکستانی سفیر نے ایسی قراردوں کا دائرہ کار مزید ریاستوں تک بڑھانے کے عزم کا اظہار بھی کیا۔

اس موقع پر قونصل جنرل محمد آفتاب چوہدری نے اسپیکر ٹیکساس اسمبلی ڈسٹن بروز سے ملاقات کی اور قرارداد کی منظوری میں ان کے کردار پر شکریہ ادا کیا۔

بعدازاں قونصل جنرل نے اسپیکر ٹیکساس کو ریاستی نمائندوں اور تاجروں کے وفد کے ہمراہ پاکستان کے دورے کی دعوت بھی دی۔