اسپیکر قومی اسمبلی سردار ایاز صادق نے کہا کہ ہماری اب بھی امید ہے کہ مذاکرات ہوں۔

اسپیکر قومی اسمبلی سردار ایاز صادق نے پارلیمنٹ ہاؤس میں میڈیا سے گفتگوکرتے ہوئے کہا کہ مذاکرات کسی ایک شخصیت کے لیے نہ ہوں، حکومت تو جواب دینا چاہتی تھی اپوزیشن کو حکم ہوا کہ مذاکرات ختم کرنے ہیں۔

اسپیکر قومی اسمبلی نے کہا کہ موسمیاتی تبدیلی کے حوالہ سے ضروری ہے کہ شجر کاری کی جائے، جتنے درخت کاٹے گئے ہیں ضروری ہے کہ نئے پودے لگائے جائیں، وزیر اعظم، وزارت داخلہ اور سی ڈی اے کا اچھا اقدام ہے۔

ایاز صادق نے کہا کہ مجھے حوالدار کہا جاتا ہے تو مجھے اس پہ فخر ہے، دو طرح کے حوالدار ہوتے ہیں ایک چور پکڑتا ہے، دوسرا شہید ہوتا ہے۔

اسپیکر قومی اسمبلی نے یہ بھی کہا کہ یہ لوگ اس ایوان کو غیر قانونی کہتے ہیں، ایوان اگر جعلی ہے تو کیا چیئرمین قائمہ کمیٹی غیر قانونی نہیں، پھر عمر ایوب نے الزام لگایا کہ انہیں بات کرنے کی اجازت نہیں دی جاتی، یہ بات کہہ کر انہوں نے سوا گھنٹے تقریر کی، کیا یہ کھلا تضاد نہیں؟

ایاز صادق کا یہ بھی کہنا تھا کہ پھر ان کا الزام ہے کہ ان کے سوال نہیں لیے جاتے میں اس حوالہ سے ریکارڈ پیش کر سکتا ہوں، وہ ایوان میں نہیں آتے، ان کے توجہ دلاؤ نوٹس ڈراپ ہو جاتے ہیں۔

اسپیکر قومی اسمبلی نے کہا کہ اب میں رولز کے مطابق کام کروں گا، دو حکومتی اراکین کے بعد ایک اپوزیشن رکن کو بولنے کی اجازت دوں گا، تالی دو ہاتھ سے بجتی ہے۔

ایاز صادق نے کہا کہ جب آپ ہاؤس میں ہوں گے نہیں اور احتجاج کرتے رہیں گے تو آپ کو موقع کم ہی ملے گا، اب میں ان کی قائم کردہ روایات کو بھی دیکھوں گا اور اس پہ چلیں گے، جس طرح یہ پروڈکشن آرڈر جاری کرتے تھے یا سب جیل بناتے تھے اسی کو دہرائیں گے، جیسی ملاقات وہ چاہتے ہیں وہ بتا بھی نہیں سکتے۔