کراچی: سندھ پولیس نے ٹرک اور ڈمپر مالکان کو اندرون 3 ماہ گاڑیوں میں کیمرے، ٹریکرز اور وہیلز کے گرد حفاظتی شیلڈز نصب کرنے کے احکامات جاری کردیے۔

کراچی میں ٹریفک مسائل کے مستقل اور پائیدار حل کے لیے سینٹرل پولیس آفس میں اہم اجلاس منعقد ہوا۔ اجلاس میں ڈی آئی جی ٹریفک نے کراچی کی شاہراہوں پر درپیش ٹریفک مسائل، حادثات اور ان کی وجوہات سے متعلق بریفنگ دی۔

ڈی آئی جی ٹریفک کے مطابق ضلع ملیر اور ویسٹ میں ٹریفک حادثات میں غیر معمولی اضافہ ہوا ہے۔ ان حادثات کی بنیادی وجوہات میں غیر تربیت یافتہ ڈرائیورز کی جانب سے گاڑی چلانا شامل ہے۔

کمشنر کراچی سید حسن نقوی نے کہا کہ مہلک اور جان لیوا ٹریفک حادثات میں ہیوی اور لائٹ وہیکلز دونوں برابر کے ذمہ دار ہیں۔ ٹریفک حادثات کی روک تھام کے لیے فوری طور پر قابل عمل اقدامات کرنا ہوں گے۔

سیکرٹری ٹرانسپورٹ سندھ اسد ضامن نے اجلاس میں بتایا کہ کمرشل وہیکل کی فٹنس انسپیکشن کا آغاز ہوچکا ہے۔ صوبے میں دو فٹنس سینٹرز قائم کردیے گئے ہیں جب کہ مزید چھ سینٹرز آئندہ چند ماہ میں فعال کیے جائیں گے۔

کراچی پولیس چیف نے کہا کہ ہیوی وہیکلز میں ٹریکرز اور کیمروں کی تنصیب کے لیے متعلقہ اسٹیک ہولڈرز کے ساتھ حکمت عملی ترتیب دینے کی ضرورت ہے۔ ڈرائیورز ٹریننگ اسکول وقت کی اہم ضرورت ہے اور انہیں پبلک پرائیویٹ پارٹنرشپ کے تحت قائم کرنا ہوگا۔

آئی جی سندھ غلام نبی میمن نے ہدایت دی کہ ٹرک اور ڈمپر مالکان گاڑیوں میں اوور اسپیڈنگ پر چیک رکھنے کے لیے کیمرے، ٹریکرز اور وہیلز کے گرد حفاظتی شیلڈز نصب کروائیں۔ عوامی سطح پر ٹرک ڈرائیورز اور مالکان کو حفاظتی تدابیر اختیار کرنے سے متعلق آگاہ کیا جائے۔

آئی جی سندھ نے کہا کہ ڈرائیورز کے رویے کی تشخیص کے لیے ڈیش بورڈ، کیبن اور پچھلے کیمرے لازمی نصب کیے جائیں۔ ٹریفک انجینئرنگ بیورو شاہراہوں پر ہیوی ٹریفک کی حد رفتار کا تعین کرے اور اسے نمایاں طور پر آویزاں کرے۔

ٹریفک انجینئرنگ بیورو کو ٹریفک اتھارٹی بنانے سے متعلق تجویز سندھ حکومت کو ارسال کی جائے گی۔ وزیر اعلیٰ سندھ کی ہدایت پر کراچی کی 6 شاہراہوں کو ماڈل بنانے کے لیے فوری حکمت عملی ترتیب دی جائے گی۔

آئی جی سندھ نے ہدایت دی کہ محکمہ پولیس، ایکسائز، ٹرانسپورٹ، ٹریفک پولیس اور دیگر اداروں کو ڈیجیٹلی مربوط کیا جائے تاکہ ٹریفک مسائل کا مؤثر حل نکالا جاسکے۔