صدر مملکت آصف علی زرداری نے پاکستان آرفن کیئر فورم کے زیرِ کفالت یتیم بچوں کے لیے ایوانِ صدر میں ایک خصوصی افطار ڈنر کا اہتمام کیا۔

یہ افطار ڈنر رمضان المبارک کی بابرکت ساعتوں میں یتیم بچوں کو خوشیوں کا حصہ بنانے کے لیے ترتیب دیا گیا تھا۔

تقریب کے دوران صدر مملکت نے یتیم بچوں سے خطاب کرتے ہوئے کہا کہ بچے ہمارا مستقبل ہیں، اور ان کی تعلیم پر خصوصی توجہ دی جانی چاہیے۔

انہوں نے کہا کہ محنت کریں تاکہ آپ کامیاب انسان بن سکیں اور میں آپ سب کو اپنے بچوں کی طرح عزیز سمجھتا ہوں۔

صدر مملکت نے اس موقع پر آرفن کیئر فورم کے زیرِ کفالت بچوں میں بطور تحفہ کمپیوٹر ٹیبلٹس بھی تقسیم کیے۔

 انہوں نے اس بات پر زور دیا کہ خاتون اول آصفہ بھٹو زرداری کے مشورے پر آپ کو یہ کمپیوٹر ٹیبلٹس دے رہا ہوں، اور آپ ان کا استعمال تعلیم حاصل کرنے اور سیکھنے کے لیے کریں۔

پاکستان آرفن کیئر فورم کے چیئرمین ایئر مارشل ریٹائرڈ فاروق حبیب نے بھی اس موقع پر خطاب کرتے ہوئے کہا کہ پاکستان میں ایک اندازے کے مطابق 46 لاکھ یتیم بچے ہیں، اور آرفن کیئر فورم اور اس سے منسلک ادارے ملک بھر میں 1 لاکھ 20 ہزار بچوں کی کفالت کر رہے ہیں۔

فورم یتیم بچوں کے حقوق کے لیے آواز بلند کر رہا ہے، اور ان کی کفالت معاشرے کی مشترکہ ذمہ داری ہے۔

فاروق حبیب نے صدر مملکت کا شکریہ ادا کرتے ہوئے کہا کہ آپ نے یتیم بچوں کی ایوانِ صدر میں میزبانی کی اور ان کی حوصلہ افزائی کی، جس سے ان بچوں کو بہت خوشی ہوئی ہے۔