وزیرِاعلیٰ پنجاب مریم نواز نے کہا کہ رنگوں کا یہ خوبصورت تہوار ہولی محبت، امن اور بھائی چارے کی علامت ہے۔

وزیرِاعلیٰ پنجاب مریم نواز شریف نے  ہولی کے تہوار پر خصوصی پیغام دیتے ہوئے کہا کہ پاکستان مختلف مذاہب کی برادریوں کا حسین امتزاج ہے، سب کو یکساں حقوق و مواقع میسر ہیں-

مریم نواز نے کہا کہ پنجاب صوفیاء، محبت اور رواداری کی دھرتی ہے، ہر مذہب، ہر برادری کو مکمل احترام حاصل ہے، ایسا پنجاب بنا رہے ہیں جہاں ہر شہری خود کو محفوظ، بااختیار اور برابر کا پاکستانی محسوس کرے۔

وزیرِاعلیٰ پنجاب کا یہ بھی کہنا تھا کہ حکومت پنجاب اقلیتوں کے تحفظ اور فلاح و بہبود کے لیے عملی اقدامات کر رہی ہے، اقلیتی برادری کے افراد کو تعلیم، صحت، روزگار اور دیگر بنیادی سہولیات یکساں طور پر فراہم کی جارہی ہیں۔

مریم نواز نے کہا کہ مینارٹی کارڈ کے زریعے نادار اقلیتی بہن بھائیوں کی ہینڈ ہولڈنگ کی جارہی ہے، اقلیتوں کے مذہبی تہواروں کے لیے گرانٹس میں اضافہ کیا گیا ہے، ادارے کے بجٹ میں بھی اضافہ کیا ہے۔

وزیرِاعلیٰ پنجاب نے کہا کہ  پنجاب حکومت اقلیتوں کے مذہبی اور ثقافتی تہواروں کو سرکاری سطح پر منانے کا بھی اہتمام کر رہی ہے، اقلیتوں کے مال و جان کے تحفظ کو  ریڈ لائن قرار دے کر یقینی بنایا جارہا ہے۔

مریم نواز شریف نے مزید یہ بھی کہا کہ دعا ہے  یہ دن سب کے لیے خوشیوں، محبت اور بین المذاہب ہم آہنگی کا پیغام لے کر آئے۔