وزیر منصوبہ بندی، ترقی اور اصلاحات احسن اقبال نے یومِ پاکستان کے موقع پر قوم کو مبارکباد دیتے ہوئے کہا کہ 23 مارچ 1940 آزادی کی جدوجہد کا فیصلہ کن موڑ تھا۔ یہ دن قومی شعور، اجتماعی خودی اور ایک روشن مستقبل کی علامت ہے۔

احسن اقبال نے اپنے پیغام میں کہا کہ یومِ پاکستان ہمیں ان قربانیوں کی یاد دلاتا ہے جو ہمارے بزرگوں نے ایک آزاد ریاست کے قیام کے لیے دیں۔

انہوں نے کہا کہ آج پاکستان صرف قائم نہیں بلکہ نئی بلندیوں کی جانب گامزن ہے۔ قیامِ پاکستان علامہ اقبال کا خواب تھا اور اسے ترقی کی بلندیوں پر لے جانا اس خواب کی عملی تعبیر ہے۔

انہوں نے کہا کہ دنیا آج ایک نئے پاکستان کو ابھرتے ہوئے دیکھ رہی ہے— ایک ایسا پاکستان جو پُرعزم، باہمت اور مستقبل کی سوچ رکھنے والا ہے۔

اس تاریخی دن کے موقع پر ہم قومی یکجہتی، معاشی استحکام اور سماجی ترقی کے عزم کا اعادہ کرتے ہیں۔

وزیر منصوبہ بندی نے ’اُڑان پاکستان‘ کے ویژن کا ذکر کرتے ہوئے کہا کہ اس کا مقصد 2035 تک پاکستان کو ایک کھرب ڈالر کی معیشت بنانا ہے۔

ان کا کہنا تھا کہ برآمدات میں اضافہ، ڈیجیٹلائزیشن، عوام کو بااختیار بنانا، ماحولیاتی تحفظ اور توانائی میں خودکفالت وہ پانچ ستون ہیں جو پاکستان کی پائیدار ترقی کی ضمانت دیں گے۔

احسن اقبال نے اس بات پر زور دیا کہ قومی ترقی کے لیے سیاسی استحکام، پالیسیوں کا تسلسل اور قومی اتفاق رائے ناگزیر ہے۔

 ترقی وقتی نعروں سے نہیں بلکہ مستقل محنت اور اصلاحات سے ممکن ہے۔ ہمیں ذاتی مفادات سے بالاتر ہوکر قومی مفاد کو ترجیح دینا ہوگا۔

انہوں نے کہا کہ پاکستان کو جدید، خوشحال اور باوقار ریاست بنانے کا وقت آ چکا ہے۔ ’اُڑان پاکستان‘ صرف ایک خواب نہیں، بلکہ ایک عملی منصوبہ ہے، جسے قومی تحریک بنانے کی ضرورت ہے۔ ہر پاکستانی کو اپنے حصے کا کردار ادا کرنا ہوگا کیونکہ یہی اصل حب الوطنی ہے۔

وزیر منصوبہ بندی نے اپنے پیغام کے اختتام پر کہا کہ یہ ملک عظیم قربانیوں سے حاصل کیا گیا ہے، اب وقت آ گیا ہے کہ ہم سب مل کر اسے عظمت کی نئی بلندیوں پر لے جائیں۔