لاہور: پاکستان ریلوے نے عید الفطر کے پرمسرت موقع پرکرایوں میں20 فیصد کمی کا اعلان کردیا۔

وفاقی وزیر ریلوے محمد حنیف عباسی نے عوام کے لیے خصوصی خوشخبری کا اعلان کرتے ہوئے کہا کہ وزیر اعظم شہباز شریف کے ویژن کے مطابق عوام کو ریلیف فراہم کرنے کے لیے یہ اقدام اٹھایا گیا ہے۔

ریلوے حکام کے مطابق پاکستان ریلوے نے عید پر کرایوں میں 20 فیصد کمی کا اعلان کیا ہے جس کا اطلاق تمام میل، ایکسپریس اور انٹرسٹی مسافر ٹرینوں پر ہوگا۔

کرایوں میں کمی کا اطلاق عید کے تینوں دنوں کی بکنگ پر ہوگا تاہم عید اسپیشل ٹرینوں پر اس رعایت کا اطلاق نہیں ہوگا جب کہ پاکستان ریلوے کی جانب سے کرایوں میں کمی کا باقاعدہ نوٹیفکیشن بھی جاری کر دیا گیا ہے۔

حکام نے بتایا کہ اس خصوصی رعایت کا مقصد عید الفطر کے موقع پر عوام کو زیادہ سے زیادہ سہولت فراہم کرنا ہے تاکہ وہ کم خرچ میں اپنے پیاروں کے ساتھ عید کی خوشیاں مناسکیں۔

وزیر ریلوے محمد حنیف عباسی نے اس بات کی بھی یقین دہانی کرائی ہے کہ تمام حفاظتی اقدامات اور ٹرین سروسز کے معیار کو برقرار رکھا جائے گا۔

ان کا کہنا تھا کہ پاکستان ریلوے عوام کو بہتر سفری سہولیات فراہم کرنے پر یقین رکھتا ہے اور مستقبل میں بھی ایسے اقدامات کیے جاتے رہیں گے۔