وزیراعظم شہباز شریف سے انفارمیشن ٹیکنالوجی کے شعبے سے تعلق رکھنے والے معروف سرمایہ کاروں نے ملاقات کی، جس میں انہوں نے پاکستان کیلئے 700 ملین ڈالر کی سرمایہ کاری کا اعلان کیا۔

وزیراعظم شہباز شریف نے ملاقات کے دوران کہا کہ پاکستان اپنی ڈیجیٹل معیشت میں بڑی تبدیلی کا آغاز کر رہا ہے، پاکستان میں کمپنیوں کی جانب سے 700 ملین امریکی ڈالر سے زیادہ کی سرمایہ کاری کے اعلان کا خیر مقدم  کرتے ہیں۔

 وزیراعظم نے پاکستان کی صلاحیتوں پر انفارمیشن ٹیکنالوجی کے شعبے سے تعلق رکھنے والے سرمایہ کاروں کے اعتماد کی پزیرائی کی، اور ٹیکنالوجی، فنانس اور جدت کا علاقائی مرکز بننے کے پاکستان کے وژن کو اجاگر کیا۔

شہباز شریف نے ملاقات میں ریگولیٹری اصلاحات، مالیاتی ترغیبات اور ڈیجیٹل انفراسٹرکچر سرمایہ کاری، اس کے علاوہ نوجوانوں کی تربیت کے ساتھ ساتھ معیشت کی ڈیجیٹلائزیشن کے لیے جاری حکومتی کوششوں کے بارے میں بھی آگاہ کیا۔

یہ بھی پڑھیں: وزیراعظم کا وزارت انفارمیشن ٹیکنالوجی کو آئی ٹی برآمدات 25 ارب ڈالر تک پہنچانے کا ہدف

وزیراعظم نے سرمایہ کاروں کو مکمل تعاون کا یقین دلاتے ہوئے طویل مدتی، باہمی طور پر فائدہ مند شراکت داری قائم کرنے کے عزم کا اعادہ کیا۔ اور پاکستانی نوجوانوں کو مستقبل کی ٹیکنالوجی پر مبنی ملازمتوں کے لیے تیار کرنے کے لیے اے آئی اور ڈیٹا سائنس کی تعلیم کے اقدامات پر ان کے ساتھ تعاون کی حکومت پاکستان کی خواہش سے آگاہ کیا۔

 وزیر اعظم سے ملاقات کرنے والوں میں روسفٹ کے  جبار رحیم خان نے 500 ملین امریکی ڈالر، جبکہ سائی وینچر کیپیٹل کے  طحہٰ نسیم اور  احسن جمیل نے 100 ملین امریکی ڈالر کی سرمایہ کاری کا اعلان کیا۔

اس کے علاوہ مشرق بینک کے فرنینڈو موریلو اور محمد ہمایوں سجاد نے 30 ملین، جبکہ مائینڈ ہائیو کے بلال کمال فاروقی نے 22 ملین امریکی ڈالر کی سرمایہ کاری کا اعلان کیا۔

وزیر برائے انفارمیشن ٹیکنالوجی اینڈ ٹیلی کام شزہ فاطمہ خواجہ اور اعلیٰ سرکاری افسران نے بھی اجلاس میں شریک تھے۔