اسلام آباد: چیف آف آرمی اسٹاف جنرل سید عاصم منیر نے کہا ہے کہ بیرون ملک مقیم پاکستانی صرف سفیر نہیں بلکہ پاکستان کی وہ روشنی ہیں جو دنیا بھر میں جگمگاتی ہے۔

آرمی چیف جنرل عاصم منیر نے اسلام آباد میں پہلے اوورسیز پاکستانی کنونشن سے خطاب کیا جس میں انہوں نے اوورسیز پاکستانیوں کے جذبات کو سراہتے ہوئے کہا کہ میں آج بیرون ملک مقیم پاکستانیوں کے جذبے سے بے حد متاثر ہوا ہوں اور آپ کو یقین دلاتا ہوں کہ ہمارے دلوں میں آپ کے لیے جو محبت ہے وہ اس سے کہیں زیادہ گہری ہے۔

جنرل عاصم منیر نے کہا کہ کچھ لوگ برین ڈرین کا تاثر دیتے ہیں لیکن وہ جان لیں کہ یہ درحقیقت برین گین ہے اور بیرون ملک مقیم پاکستانی اس کی بہترین مثال ہیں۔

انہوں نے کہا کہ اوورسیز پاکستانی جہاں بھی ہوں، انہیں اپنی شناخت اور تہذیب پر فخر ہونا چاہیے۔ “پ کی میراث ایک عظیم نظریے، تہذیب اور اعلیٰ معاشرے سے جڑی ہے۔

آرمی چیف نے شرکاء کو یاد دلایا کہ پاکستان ایک عظیم قربانی کے نتیجے میں حاصل ہوا اور یہی داستان ہمیں اپنی نئی نسل کو منتقل کرنی ہے۔

قوم اور فوج متحد، دشمنوں کے عزائم ناکام ہوں گے

اپنے خطاب میں آرمی چیف نے ملک کی سلامتی اور خودمختاری پر واضح پیغام دیتے ہوئے کہا کہ کیا پاکستان کے دشمنوں کا خیال ہے کہ مٹھی بھر دہشت گرد اس قوم کی تقدیر کا فیصلہ کرسکتے ہیں؟ دہشتگردوں کی دس نسلیں بھی بلوچستان یا پاکستان کا کچھ نہیں بگاڑسکتیں۔

انہوں نے کہا کہ بلوچستان پاکستان کے ماتھے کا جھومر ہے اور ہماری قومی تقدیر کا حصہ ہے۔ پاکستان کو اللہ تعالیٰ نے بے پناہ وسائل سے نوازا ہے اور جب تک اس ملک کے غیور عوام اپنی افواج کے شانہ بشانہ کھڑے ہیں، کوئی بھی ہمیں نقصان نہیں پہنچا سکتا۔

ملک دشمن عناصر کے خلاف متحد رہنے کا عزم

آرمی چیف کہتے ہیں کہ پاکستان کو ترقی کی راہ سے روکنے کی ہر کوشش کو ناکام بنایا جائے گا۔

آج ہم سب مل کر یہ پیغام دے رہے ہیں کہ جو پاکستان کی ترقی کے راستے میں رکاوٹ بنے گا ہم مل کر اسے ہٹادیں گے۔

انہوں نے یہ بھی کہا کہ پاکستانی قوم کبھی بھی مشکلات سے نہیں گھبرائی اور نہ ہی آئندہ جھکے گی۔ ہم مسلمان اور پاکستانی ہیں، نامساعد حالات کا مقابلہ کرنا ہماری تاریخ کا حصہ ہے۔

شہداء کا احترام، کشمیر اور غزہ سے اظہار یکجہتی

اپنے خطاب میں آرمی چیف نے شہداء کو خراج عقیدت پیش کرتے ہوئے کہا کہ قوم اپنے شہداء کو نہایت عزت اور وقار کی نگاہ سے دیکھتی ہے۔ ان کی قربانیاں ناقابل فراموش ہیں اور ہم ان پر کبھی افسوس نہ ہونے دیں گے۔

انہوں نے دوٹوک کہا کہ کشمیر پاکستان کی شہ رگ تھا، ہے اور ہمیشہ رہے گا جب کہ پاکستانیوں کا دل ہمیشہ غزہ کے مسلمانوں کے ساتھ دھڑکتا ہے۔

پاکستان ترقی کی راہ پر گامزن

آرمی چیف نے کہا کہ پاکستان ترقی کی راہ پر گامزن ہے، اب سوال یہ نہیں کہ پاکستان نے کب ترقی کرنی ہے بلکہ سوال یہ ہے کہ پاکستان نے کتنی تیزی سے ترقی کرنی ہے۔

خطاب کے اختتام پر جنرل عاصم منیر اور شرکاء نے مل کر پرجوش نعرہ لگایا ’’پاکستان ہمیشہ زندہ باد‘‘۔