بھارت کے جنگی جنون اور پہلگام میں مبینہ فالس فلیگ آپریشن پر پاکستان کی معروف شخصیات نے شدید ردعمل دیا ہے اور بھارت کے عزائم پر سنجیدہ سوالات اٹھا دیے ہیں۔

 قوم کی یکجہتی اور مسلح افواج کی حمایت میں اہم شخصیات کا کہنا ہے کہ بھارت کسی بھی قسم کی مہم جوئی سے باز رہے، کیونکہ پاکستان اپنی خودمختاری کے تحفظ کے لیے ہر سطح پر تیار ہے۔

سینئر اداکار جاوید شیخ نے بھارت کی ایف آئی آر میں واقعے کے آدھے گھنٹے کے اندر ہی پاکستان کا نام شامل کرنے پر حیرانی کا اظہار کرتے ہوئے کہا کہ یہ عمل سمجھ سے بالاتر ہے۔

 ان کا کہنا تھا کہ اگر بھارت نے کوئی حملہ کیا تو ہماری فوج مکمل تیار ہے اور ہم منہ توڑ جواب دیں گے۔ جنگ کی صورت میں پوری قوم اپنی بہادر مسلح افواج کے ساتھ کھڑی ہو گی۔

اداکارہ لیلیٰ زبیری نے بھی بھارتی عزائم کی شدید مذمت کرتے ہوئے کہا کہ قوم اپنی مسلح افواج کے شانہ بشانہ ہے اور بھارت کو اینٹ کا جواب پتھر سے دیا جائے گا۔

سابق کپتان قومی کرکٹ ٹیم معین خان نے بھارتی حکومت کو خبردار کرتے ہوئے کہا کہ بھارت کوئی حماقت نہ کرے۔ ہماری مسلح افواج کسی بھی حملے کا بھرپور جواب دینے کی پوری صلاحیت رکھتی ہیں۔

اداکار عدنان صمد نے کہا کہ اگر ملکی سالمیت کو خطرہ لاحق ہوا تو قوم، حکومت اور مسلح افواج ایک پیج پر ہوں گے۔

گلوکار فاخر محمود نے اپنے خیالات کا اظہار کرتے ہوئے کہا کہ پاکستانی قوم خودمختار ہے اور اپنی سیکیورٹی پر کبھی کوئی سمجھوتہ نہیں کرے گی۔