شہر قائد کے علاقے نارتھ کراچی پاور ہاؤس کے قریب تیز رفتار ڈمپر نے متعدد موٹر سائیکل سوار افراد کو ٹکر مار دی جس کے نتیجے میں ایک خاتون جاں بحق اور کئی افراد زخمی ہوگئے۔

ریسکیو ذرائع کے مطابق حادثے میں زخمی ہونے والے افراد کو فوری طور پر اسپتال منتقل کر دیا گیا۔

پولیس نے بتایا ہے کہ ڈمپر ناگن چورنگی سے ہی مختلف گاڑیوں کو ٹکر مارتا ہوا آرہا تھا۔

حادثے کے بعد نامعلوم مشتعل افراد نے ڈمپر کے خلاف شدید احتجاج کرتے ہوئے مختلف مقامات پر 5 ڈمپرز، ایک واٹر ٹینکر اور اور ایک ٹرک کو آگ لگا دی۔

ڈمپروں کو نذر آتش کرنے کی اطلاع پر فائر بریگیڈ اور پولیس کی بھاری نفری موقع پر پہینچ گئی جبکہ مشتعل افراد کی جانب سے فائر بریگیڈ کی گاڑیوں پر بھی پتھراؤ کیا گیا۔

ابتدائی اطلاعات کے مطابق ڈمپر کی ٹکر سے کسی شہری کے زخمی ہونے کے بعد صورتحال انتہائی کشیدہ ہوگئی اور موقع پر موجود افراد کی جانب سے ڈمپر کا تعاقب کیا گیا اور اسے نذر آتش کر دیا گیا۔

اس کے علاوہ گزرنے والے دیگر ڈمپرز پر بھی نامعلوم مشتعل افراد پتھراؤ کر کے شیشے توڑ دیے اور انہیں بھی نذر آتش کر دیا۔

رات گئے علاقے سے ملنے والی اطلاعات کے مطابق ناگن چورنگی سے فور کے چورنگی تک صورتحال انتہائی کشیدہ ہوگئی۔

 ڈمپر میں لگی آگ کو بجھانے کے لیے آنے والی فائر بریگیڈ کی گاڑیوں پر بھی مشتعل افراد نے پتھراؤ کیا جبکہ اس موقع پر ہوائی فائرنگ کی بھی آوازیں سنائی دی گئیں۔

پولیس اس صورتحال پر قابو پانے ناکام رہی جبکہ مشتعل افراد ٹولیوں کی شکل میں پاور ہاؤس سمیت ملحقہ سڑکوں پر دکھائی دیے۔