کراچی: گورنر سندھ کامران ٹیسوری نے ڈمپر حادثات میں جاں بحق افراد کے ورثاء کو پلاٹ اور بچوں کو اعلیٰ تعلیم دلوانے کا اعلان کردیا۔

گورنر سندھ کامران خان ٹیسوری نے گورنر ہاؤس میں میڈیا سے گفتگو کرتے ہوئے کہا کہ کراچی میں ٹریفک حادثات میں روزانہ قیمتی جانیں ضائع ہو رہی ہیں لیکن قانون پر عمل درآمد نہ ہونے کے باعث صورت حال بد سے بدتر ہوتی جا رہی ہے۔

ان کا کہنا تھا کہ آج گورنر ہاؤس میں ان تمام خاندانوں کو بلایا گیا ہے جن کے پیارے ڈمپرز کی ٹکر سے جاں بحق ہوئے۔ جن کے پیارے ان حادثات میں ہم سے بچھڑ گئے، ان کے آنسو اب تک نہیں تھمے۔

کامران ٹیسوری نے کہا کہ کسی کی جان کا کوئی معاوضہ، پلاٹ یا پیسہ نہیں ہو سکتا تاہم گورنر سندھ نے متاثرہ خاندانوں کو ایک ایک پلاٹ دینے اور متاثرین کے بچوں کو 12 سال تک مفت تعلیم فراہم کرنے کا اعلان بھی کیا

انہوں نے چیف جسٹس آف پاکستان کا شکریہ ادا کرتے ہوئے کہا کہ ان کے خط پر نوٹس لے لیا گیا ہے اور اب متاثرین کو انصاف ضرور ملے گا۔

انہوں نے یہ بھی کہا کہ اگر وقت آیا تو وہ سب سے پہلے اپنی ذاتی گاڑیاں اور بنگلا بیچ کر متاثرین کی مدد کریں گے۔ انہوں نے افسوس کا اظہار کیا کہ متاثرہ خاندانوں کی ایف آئی آرز تک درج نہیں کی جا رہیں اور یہ ایک المیہ ہے کہ لاشوں پر سیاست کی جا رہی ہے۔

انہوں نے خبردار کرتے ہوئے کہا کہ اس معاملے پر سیاست بند کی جائے، لوگوں کے جذبات سے نہ کھیلا جائے، سندھ اور کراچی کو بیرونی سازشوں کا شکار نہیں ہونے دیا جائے گا۔

انہوں نے اس عزم کا اظہار کیا کہ اب کراچی میں تعلیم، صحت اور ہنر کی بات ہوگی، نہ کہ لسانیت اور تقسیم کی، آج گورنر ہاؤس میں ہر قومیت سے تعلق رکھنے والے متاثرین موجود ہیں اور میں ان سب کا بھائی بھی ہوں اور گورنر بھی۔