کراچی: صوبائی سینئر وزیر شرجیل انعام میمن نے کراچی میں بڑھتے ہوئے حادثات پر تشویش کا اظہار کرتے ہوئے کہا کہ اچانک سے حادثات کا بڑھنا سوالیہ نشان ہے۔

سندھ کے سینئر وزیر شرجیل انعام میمن نے کراچی میں پریس کانفرنس کرتے ہوئے بڑھتے ہوئے حادثات پر تشویش کا اظہار کیا اور کہا کہ ہیوی ٹریفک اور موٹر سائیکلیں پہلے بھی چلتی تھیں لیکن  اچانک ایسا کیا ہوا جس سے حادثات بڑھ گئے؟۔

انہوں نے کہا کہ وزیراعلیٰ سندھ نے ذاتی طور پر فیصلے کیے ہیں اور اب کراچی میں ٹریفک قوانین کی خلاف ورزی پر کریک ڈاؤن کیا جائے گا۔

انہوں نے بتایا کہ 250 گاڑیاں ضبط کی گئی ہیں جب کہ 4 ہزار سے زائد موٹر سائیکلیں ہیلمٹ نہ پہننے پر بند کی گئیں۔ ہیلمٹ نہ پہننے پر پہلا چالان ایک ہزار اور دوسرا 1500 روپے کا ہے۔

سیاست اور فسادات کا خطرہ

شرجیل میمن نے کہا کہ چند سیاسی جماعتیں اس ایشو پر سیاست کرنے کی کوشش کر رہی ہیں، اشتعال انگیز زبان استعمال کی جا رہی ہے تاکہ عوام کو آپس میں لڑایا جا سکے۔

انہوں نے خبردار کیا کہ جو بھی شخص فسادات کی ترغیب دے گا یا اس میں ملوث پایا گیا، اس کے خلاف سخت کارروائی کی جائے گی۔

ان کا کہنا تھا کہ حال ہی میں چند ڈمپرز کو آگ لگائی گئی، ان لیڈرز کا پتا کریں جن کی تقریروں کے بعد گاڑیاں جلیں، وہ اب ان لوگوں کو چھڑانے کیوں نہیں آ رہے؟۔

سوشل میڈیا کے غلط استعمال پر ایکشن

صوبائی وزیر نے کہا کہ سوشل میڈیا پر بدتمیزی، گالی گلوچ، نفرت انگیز بیانات اور پروپیگنڈا کے خلاف سخت کارروائی ہوگی جب کہ ایف آئی اے سائبر کرائم اور پی ٹی اے اس پر ایکشن لیں گے۔

شرجیل میمن کہتے ہیں کوئی بھی شخص اگر فساد پھیلانے یا لوگوں کو مشتعل کرنے کی کوشش کرے گا تو اسے بخشا نہیں جائے گا۔

عرفان صدیقی آئین پڑھیں یا استعفیٰ دیں

صوبائی وزیر نے سینیٹر عرفان صدیقی پر سخت تنقید کرتے ہوئے کہا ہے کہ اگر وہ آئین نہیں پڑھتے تو سینیٹ میں بیٹھنے کا کوئی جواز نہیں۔ عرفان صدیقی کو چاہیے کہ آئین کا مطالعہ کریں، بصورت دیگر استعفیٰ دے دیں۔

شرجیل میمن کا کہنا تھا کہ عرفان صدیقی کا بیان بغضِ پیپلزپارٹی کا نتیجہ ہے، ان کی گفتگو قابل مذمت ہے۔

انہوں نے یاد دلایا کہ عرفان صدیقی نے دعویٰ کیا تھا کہ پیپلزپارٹی نے کبھی نہروں کی مخالفت نہیں کی حالانکہ 2021 میں تھل کینال کے خلاف سندھ اسمبلی سے قرارداد منظور کی گئی تھی۔ جلال پور کینال کا معاملہ بھی سی سی آئی میں اٹھایا گیا تھا۔

انہوں نے ن لیگ کے کچھ رہنماؤں کو بھی تنقید کا نشانہ بناتے ہوئے کہا کہ ان کا مائنڈ سیٹ آئین و قانون سے لاعلمی پر مبنی ہے۔

شرجیل میمن نے طنزیہ انداز میں سوال کیا کہ کیا عرفان صدیقی کو علم ہے کہ سمریاں صدرِ مملکت کے پاس جاتی ہیں یا نہیں؟، انہوں نے کہا کہ صدرِ مملکت نے بھی مشترکہ اجلاس میں کینالز پر بات کی، شاید عرفان صدیقی نے وہ تقریر سنی ہی نہیں۔

انہوں نے دوٹوک موقف اختیار کرتے ہوئے مزید کہا کہ اگر عرفان صدیقی کو اعتبار نہیں تو ہم انہیں دستاویزی شواہد بھی بھیج سکتے ہیں۔ اگر وہ قرارداد کو نہیں سمجھتے تو پھر استعفیٰ دے دینا چاہیے۔