اسلام آباد: عالمی مالیاتی فنڈ (آئی ایم ایف) نے گورننس سے متعلق تکنیکی معاونت کے لیے وفد پاکستان بھیجنے کا فیصلہ کرلیا۔

اعلیٰ سطح ذرائع نے بول نیوز کو تصدیق کی ہے کہ آئی ایم ایف کا وفد جلد پاکستان کے دورے پر آرہا ہے، وفد پاکستان کی گورنننس سے متعلق امور کی تکنیکی معاونت کے لیے دورہ کرے گا، آئی ایم ایف وفد کا یہ دورہ گورننس سے متعلق امور کا فالواپ ہوگا۔

اعلیٰ سطح ذرائع نے تصدیق کی ہے کہ بجٹ سے متعلق بات چیت کے لیے آئی ایم ایف کا کوئی دورہ شیڈول نہیں، بجٹ سے متعلق آئی ایم ایف سے ورچوئل بات چیت کا امکان ہے۔

یاد رہے کہ اس سے پہلے آئی ایم ایف نے گورنننس، کرپشن کے تشخیصی جائزے کے لیے پاکستان کے اقدامات کی تعریف کی تھی۔

 آئی ایم ایف مشن نے 6 فروری سے 14 فروری 2025 کو پاکستان کا دورہ کیا تھا جس کا مقصد گورننس، بدعنوانی کے تشخیصی جائزے کی تیاری کے لیے ابتدائی کام مکمل کرنا تھا۔

 مشن کا مقصد 6 بنیادی ریاستی افعال میں گورننس، بدعنوانی کےخطرات کا ابتدائی جائزہ لینا تھا، جن میں مالیاتی طرزحکمرانی، مرکزی بینک کی حکمرانی، آپریشنز، مالیاتی شعبے کی نگرانی، مارکیٹ کے ضوابط، قانون کی حکمرانی سے متعلق امور شامل تھے۔

اس کے علاو منی لانڈرنگ اور دہشت گردی کی مالی معاونت کے انسداد سے متعلق امور بھی شامل تھے۔

ذرائع نے بتایا کہ آئی ایم ایف اسکوپنگ مشن نے دورے میں متعدد اسٹیک ہولڈرز سے ملاقاتیں کی تھیں، وفد نے وزارت خزانہ، ایف بی آر اور اسٹیٹ بینک آف پاکستان کے حکام سے ملاقاتیں کی تھیں۔

وفد نے وزارت قانون اور سپریم کورٹ آف پاکستان سے مشاورت کی تھی اور ایس ای سی پی، کاروباری برادری، سول سوسائٹی عالمی پارٹنرز اور آڈیٹرجنرل آف پاکستان کے حکام سے ملاقاتیں کی تھیں۔

مزید برآں آئی ایم ایف نے حکومتِ پاکستان کی سنجیدگی اورعزم کو سراہا تھا، پاکستان کے ساتھ تعاون کو آگے بڑھانے کے لیے امید ظاہر کی تھی۔