پاکستان اور خلیج تعاون کونسل (جی سی سی) ممالک کے مابین انسداد منشیات کے حوالے سے دو روزہ اہم کانفرنس 16 سے 17 اپریل 2025 تک اسلام آباد میں منعقد ہوئی۔

اس کانفرنس کا مقصد منشیات کی روک تھام، انٹیلیجنس شیئرنگ اور خطے میں باہمی تعاون کو فروغ دینا تھا۔

پاکستان اور جی سی سی ممالک کے درمیان تعلقات مذہبی، ثقافتی اور تاریخی اقدار پر مبنی ہیں، اور دونوں فریق خطے میں امن و استحکام کے لیے تعاون کو فروغ دینے کے خواہاں ہیں۔

افغانستان سے جغرافیائی قربت کے باعث پاکستان منشیات کی اسمگلنگ اور اس سے منسلک سیکیورٹی چیلنجز کا سامنا کر رہا ہے۔

اس موقع پر اس بات کا بھی انکشاف ہوا کہ منشیات اسمگلرز اور دہشتگردوں کے درمیان مالی تعاون پایا جاتا ہے۔

اینٹی نارکوٹکس فورس (اے این ایف) نے کارروائی کرتے ہوئے 2024 تا 2025 کی پہلی سہ ماہی میں 428.403 میٹرک ٹن منشیات ضبط کیں، جب کہ ملک میں منشیات کے 29 نیٹ ورکس کا خاتمہ کیا گیا۔

جی سی سی ممالک کو اسمگل کی جانے والی 48.431 میٹرک ٹن منشیات کو بھی مستعدی سے روکا گیا، جو کل ضبط شدہ مقدار کا 11.30 فیصد بنتی ہے۔

کانفرنس میں اس بات پر زور دیا گیا کہ جی سی سی ممالک کے ساتھ جدید ٹیکنالوجی، معلومات کے تبادلے اور انٹیلیجنس شیئرنگ کو مزید مؤثر بنانے کی ضرورت ہے۔

پاکستان نے اپنی زیرو ٹالرنس پالیسی کے تحت انسداد منشیات کی کوششوں کو مزید تیز کرنے کے عزم کا اعادہ کیا۔

کانفرنس کے اختتام پر پاکستان اور جی سی سی ممالک نے دنیا کو منشیات سے پاک کرنے کے لیے مشترکہ عزم کا اظہار کیا اور اس عالمی مسئلے کے خلاف ایک مضبوط اور مربوط حکمت عملی پر عمل درآمد پر اتفاق کیا۔