اسلام آباد: وزیر دفاع خواجہ آصف نے پارلیمنٹ ہاؤس کے باہر میڈیا سے گفتگو کرتے ہوئے واضح پیغام دیا کہ کسی کو شک نہیں ہونا چاہئے، بھارت کو بھرپور جواب دیں گے۔

وزیر دفاع خواجہ آصف کا کہنا تھا کہ بھارتی حملے کو دیکھیں گے، اگر خلاف ورزی ہوتی ہے تو ہم نے ردعمل دینا ہے اور جس طرح کا بھارت کاعمل ہوگا اسی طرح کا ردعمل بھی دیا جائے گا۔

خواجہ آصف نے واضح کہا کہ کسی کو شک نہیں ہونا چاہئے، بھارت کو بھرپور جواب دیں گے، جیسے جیسے وقت گزر رہا ہے حملے کے خطرات بڑھ رہے ہیں جب کہ دوست ممالک، پڑوسی ممالک اور خطے کی بڑی طاقتیں بھی ثالثی کا کردار ادا کررہی ہیں۔

وزیر دفاع کہتے ہیں کہ دوست ممالک چاہتے ہیں کہ جنگ کی صورتحال نہ بنے، اللہ کرے ان ممالک کی کوششوں سے بھارت کو کچھ عقل آئے۔

انہوں نے بتایا کہ شہبازشریف نے واضح کیا کہ معاملے کی بین الاقوامی سطح پرتحقیقات کروائی جائیں، عالمی تحقیقات کے مطالبے پر بھارت نے کوئی جواب نہیں دیا اس کا مطلب ہے کہ دال میں کچھ کالا ہے۔

ان کا یہ بھی کہنا تھا کہ بی جے پی کو جب ووٹ کی ضرورت ہوتی ہے تو وہ پاکستان کو کسی نہ کسی مسئلے میں شامل کرتی ہے۔

خواجہ آصف نے مزید کہا کہ ہماری طرف سے جنگ کا آغاز نہیں ہوگا لیکن اگر جنگ مسلط کی تو بھرپور جواب دیں گے اور بھارت جتنی طاقت کا استعمال کرے گا اس سے زیادہ طاقت سے جواب دیں گے۔