راولپنڈی: سیکیورٹی فورسز نے خیبرپختونخوا کے علاقے شمالی اور جنوبی وزیرستان میں کامیاب آپریشن کرتے ہوئے 6 خوارج کو جہنم واصل کردیا۔

پاک فوج کے شعبہ تعلقات عامہ (آئی ایس پی آر) کے مطابق خیبرپختونخوا کے مختلف علاقوں میں سیکیورٹی فورسز نے دو علیحدہ انٹیلی جنس بیسڈ آپریشنز کے دوران 6 خوارج دہشت گردوں کو ہلاک کردیا۔

آئی ایس پی آر کا کہنا ہے کہ شمالی وزیرستان کے علاقے رزمک میں کیے گئے آپریشن کے دوران پانچ خوارج ہلاک ہوئے جب کہ جنوبی وزیرستان میں ایک اور آپریشن میں خوارج کے سرغنہ ذبیح اللہ کو ہلاک کردیا گیا۔

ترجمان پاک فوج نے بتایا کہ ذبیح اللہ قانون نافذ کرنے والے اداروں کو مطلوب تھا اور دہشت گردی کی کارروائیوں اور بے گناہوں کے قتل میں ملوث تھا۔

آئی ایس پی آر نے مزید بتایا کہ علاقے میں مزید خوارج کی تلاش کے لیے کلیئرنس آپریشن جاری ہے جب کہ  سیکیورٹی فورسز دہشت گردی کے خاتمے کے لیے پُرعزم ہے۔

صدر مملکت کا خراج تحسین

صدر مملکت آصف زرداری نے 6 دہشت گردوں کو جہنم واصل کرنے پر سیکیورٹی فورسز کو خراج تحسین پیش کرتے ہوئے کہا کہ حکومت ملک سے دہشت گردوں کے مکمل خاتمے کے لیے پرعزم ہے۔

انہوں نے قوم کے عزم کا اظہار کرتے ہوئے مزید کہا کہ قوم دہشت گردی کے خلاف متحد ہے اور دہشت گردوں کے مکمل خاتمے تک کارروائیاں جاری رہیں گی۔

وزیر اعظم کی ستائش

وزیراعظم شہباز شریف نے بھی شمالی وزیرستان اور جنوبی وزیرستان میں دہشت گردوں کے خلاف کامیاب کارروائیوں پر سیکیورٹی فورسز کی ستائش کی۔

وزیراعظم نے خوارجی دہشت گردوں کے رنگ لیڈر سمیت 6 دہشت گردوں کو ہلاک کرنے پر سیکیورٹی فورسز کو خراج تحسین بھی پیش کیا۔

شہباز شریف کا کہنا تھا کہ پوری قوم سیکیورٹی فورسز کے ساتھ کھڑی ہے اور ملک سے دہشت گردوں کا مکمل خاتمہ ہماری اولین ترجیح ہے۔