جنوبی وزیرستان: جنوبی وزیرستان میں فتنہ الخوارج کے دہشت گردوں کے خلاف قبائلی عوام کی جانب سے بڑی مزاحمت سامنے آئی ہے۔

سیکیورٹی ذرائع کے مطابق دوتانی قبیلے نے حالیہ دہشت گردی کے واقعات کے بعد قومی جرگہ طلب کرکے دہشت گردوں کے خلاف متحد ہونے کا اعلان کردیا۔

ذرائع کا کہنا ہے کہ چند روز قبل دہشت گردوں نے دوتانی قبیلے سے تعلق رکھنے والے کانسٹیبل حمید شاہد اور اشرف کو اغوا کرکے شہید کر دیا تھا۔

ذرائع نے بتایا کہ اس بہیمانہ کارروائی کے بعد قبائل نے ایک مؤثر اور بھرپور ردعمل دیا جس میں جرگہ بلاکر علاقے میں فتنہ الخوارج کو جڑ سے اکھاڑنے کے عزم کا اظہار کیا گیا۔

سیکیورٹی ذرائع نے کہا کہ یہ پہلا موقع نہیں جب خیبرپختونخوا کے عوام نے دہشت گردوں کے خلاف آواز بلند کی ہو۔ صوبے کے مختلف علاقوں میں عوام اب پاک فوج کے شانہ بشانہ سیسہ پلائی دیوار بن چکے ہیں۔

ذرائع نے مزید بتایا کہ عوامی مزاحمت کی بدولت فتنہ الخوارج مایوسی اور بدحواسی کا شکار ہوچکا ہے۔ 12 اپریل کی شب ڈی آئی خان اور ڈی جی خان کے سرحدی علاقوں میں بھی عوام نے خوارج کو گاؤں سے نکال باہر کیا تھا۔

ذرائع نے یہ بھی بتایا کہ اس موقع پر ایک بڑے عوامی اجتماع میں فیصلہ کیا گیا کہ دہشت گردوں کو کسی صورت اپنے علاقوں میں داخل نہیں ہونے دیا جائے گا۔

دفاعی ماہرین کا کہنا ہے کہ دوتانی قبیلے کی جانب سے دہشتگردوں کے خلاف دوٹوک اعلان خوارج کے لیے ایک واضح پیغام ہے کہ قبائلی عوام اب کسی صورت دہشت گردی کو برداشت نہیں کریں گے۔ ان کے مطابق یہ عوامی اتحاد دہشتگردوں کے لیے بڑا دھچکا اور ریاست کے لیے نئی امید ہے۔

مزید برآں ماہرین نے کہا کہ خیبرپختونخوا کے عوام کی جانب سے فتنہ الخوارج کے خلاف کھڑا ہونا پاکستان کے روشن مستقبل کی نوید ہے۔ اب دہشت گردوں کے لیے ملک میں چھپنے کی کوئی جگہ باقی نہیں بچی۔