اسلام آباد: این ڈی ایم اے نے مغربی موسمی سلسلے کے باعث پنجاب، اسلام آباد اور شمالی علاقہ جات میں آئندہ 12 گھنٹوں کے دوران شدید موسمی صورتحال کے پیش نظر ایڈوائزری جاری کردی۔

این ڈی ایم اے کی جانب سے جاری کردہ ایڈوائزری کے مطابق مغربی سسٹم کے اثرات کے تحت مختلف علاقوں میں گرج چمک کے ساتھ موسلادھار بارش، آندھی اور بعض مقامات پر ژالہ باری کا امکان ظاہر کیا گیا ہے۔

ان موسمی اثرات سے اسلام آباد، راولپنڈی، اٹک، چکوال، گجرات اور جہلم کے اضلاع کے متاثر ہونے کا خدشہ ہے۔

اسی طرح فیصل آباد، حافظ آباد، جھنگ، خوشاب، میانوالی اور لاہور میں بھی شدید بارش متوقع ہے۔ نارووال، ساہیوال، سرگودھا اور شیخوپورہ کے اضلاع بھی متاثر ہوسکتے ہیں۔

ایڈوائزری میں خبردار کیا گیا ہے کہ موسلادھار بارش سے کمزور درختوں کے گرنے کے باعث بجلی کی بندش کا خطرہ پیدا ہوسکتا ہے جبکہ آندھی اور ژالہ باری سے کمزور عمارتوں، چھتوں، کھڑی گاڑیوں اور بجلی کے کھمبوں کو نقصان پہنچنے کا خدشہ ہے۔

ژالہ باری سے گندم سمیت دیگر کھڑی فصلوں کو بھی شدید نقصان پہنچنے کا امکان ہے، شمالی علاقہ جات میں بھی صورتحال تشویشناک ہوسکتی ہے۔

دیر، سوات، کوہستان، چترال اور مانسہرہ کے ندی نالوں میں سیلابی کیفیت پیدا ہونے کی پیشگوئی کی گئی ہے۔ خیبر، مہمند اور باجوڑ کے ندی نالوں میں بھی 18 سے 20 اپریل کے دوران سیلابی صورتحال کا امکان ظاہر کیا گیا ہے۔

این ڈی ایم اے نے متعلقہ اداروں کو الرٹ رہنے اور عوام سے احتیاطی تدابیر اختیار کرنے کی اپیل کی ہے تاکہ ممکنہ نقصانات سے بچا جاسکے۔