اسلام آباد: ترجمان دفتر خارجہ شفقت خان نے ایران میں 8 پاکستانی شہریوں کے قتل پر ردعمل دیتے ہوئے کہا کہ حقائق سامنےآنے کے بعد باضابطہ تبصرہ کریں گے۔

ترجمان دفتر خارجہ کی جانب سے جاری بیان میں کہا گیا کہ ایرانی صوبے سیستان میں افسوسناک واقعے کاعلم ہے، اس معاملے پر ایرانی حکام سے رابطے میں ہیں۔

انہوں نے کہا کہ حقائق سامنے آنے کے بعد باضابطہ تبصرہ کریں گے، واقعے کی تفصیلات کی تصدیق کے منتظر ہیں۔

ترجمان شفقت خان نے مزید کہا کہ تہران میں پاکستانی سفارتخانہ مسلسل رابطے میں ہے، زاہدان میں پاکستانی قونصلیٹ بھی متحرک ہے، متعلقہ ایرانی حکام سےمسلسل رابطہ جاری ہے۔

واضح رہے کہ گزشتہ روز ایران کے صوبہ سیستان و بلوچستان میں پاک، ایران سرحد کے قریب ایک افسوسناک واقعے میں 8 پاکستانیوں کو قتل کر دیا گیا۔

ذرائع نے بتایا کہ اندوہناک واقعہ صوبہ سیستان میں ضلع مہرستان کے گاؤں حائض آباد میں پیش آیا اور تمام مقتولین کو ہاتھ پاؤں باندھ کر گولیاں ماری گئیں جبکہ مقتولین میں دِلشاد، اُس کا بیٹا نعیم، جعفر، دانش ، ناصر اور دیگر شامل ہیں۔

مقتولین کار مرمت، پالش اور پینٹنگ والی ورکشاپ میں رہائش پذیر تھے اور ان کا تعلق پاکستان کے شہر بہاولپور سے تھا، حملہ آوروں نے رات کے وقت ورکشاپ میں گھس کر فائرنگ کی۔

پاکستانی سفارت خانہ کے حکام واقعے کی تفصیلات حاصل کرنے میں مصروف ہیں اور ایرانی حکام کی جانب سے تحقیقات کا عمل جاری ہے۔