اسلام آباد: صدر مملکت آصف علی زرداری اور وزیراعظم محمد شہباز شریف نے مستونگ میں بلوچستان کانسٹیبلری کی گاڑی پر دہشتگرد حملے کی شدید مذمت کی ہے۔

صدر آصف زرداری نے مستونگ میں بلوچستان کانسٹیبلری کی گاڑی کے قریب دھماکے میں 3 اہلکاروں کی شہادت پر گہرے دُکھ اور افسوس کا اظہار کیا۔

صدر مملکت نے ملکی سلامتی کی خاطر جان کا نذرانہ پیش کرنے پر بلوچستان کانسٹیبلری کے اہلکاروں کو خراجِ عقیدت بھی پیش کیا۔

آصف زرداری نے ملک سے دہشتگردی کے مکمل خاتمے کیلئے کاوشیں جاری رکھنے کے عزم کا اعادہ کیا۔

صدر مملکت نے دھماکے کے شہداء کیلئے بلندی درجات، لواحقین کیلئے صبر جمیل زخمی ہونے والوں کی جلد صحت یابی کی دعا بھی کی۔

وزیراعظم شہباز شریف

دوسری جانب وزیراعظم شہباز شریف نے بھی بلوچستان کے ضلع مستونگ کے علاقے شمس آباد میں بلوچستان کانسٹیبلری کی گاڑی پر دہشتگرد حملے کی شدید مذمت کی اور تین اہلکاروں کی شہادت پر افسوس کا اظہار بھی کیا۔

وزیراعظم نے شہداء کے لیے دعائے مغفرت اور لواحقین کے لیے صبر و استقامت کی دعا بھی کی۔

شہباز شریف نے زخمیوں کو فوری طبی امداد فراہم کرنے کی ہدایت دی اور کہا کہ انسانیت کے دشمن دہشتگردوں کے مذموم عزائم کو خاک میں ملائیں گے، ملک سے دہشتگردی کے مکمل خاتمے تک ہماری دہشتگردوں کے خلاف جنگ جاری رہے گی۔