لاہور: پنجاب کے بڑے شہروں میں مرحلہ وار تعمیر ومرمت اور بحالی کے منصوبوں کی اصولی منظوری دے دی گئی۔

وزیراعلیٰ پنجاب مریم نواز شریف کی زیر صدارت خصوصی اجلاس ہوا جس میں صوبے بھر میں محکمہ لوکل گورنمنٹ اینڈ کمیونٹی ڈویلپمنٹ کے زیرا ہتمام نئے پراجیکٹس پر تفصیلی بریفنگ دی گئی۔

اجلاس میں پنجاب کے بڑے شہروں میں مرحلہ وار تعمیر ومرمت اور بحالی کے پراجیکٹس کی اصولی منظوری دی گئی اور بتایا گیا کہ پہلے مرحلے میں 59بڑے شہروں میں سیوریج اینڈ ڈرینج انفراسٹرکچر تعمیر ہوگا، بڑے شہروں میں بارش کے پانی کے فوری نکاس کے لئے رین واٹر سٹوریج ٹینک بنائے جائیں گے۔

بریفنگ میں بتایا گیا کہ واٹر سپلائی ٹیوب ویل ،بجلی  بلوں کا بوجھ کم کرنے کے لئے سولر انرجی پر منتقل کیے جائیں گے، گلیوں کی تعمیر و مرمت اور ٹف ٹائل لگائی جائے گی جبکہ پہلے فیز میں شامل شہروں میں پارک بھی ڈویلپ ہونگے۔

وزیراعلیٰ مریم نواز نے پارکس میں بچوں کے لئے جھولے اور اسپورٹس کی دیگر سہولتیں فراہم کرنے اور پنجاب کے دیہات میں بھی یکساں ڈویلپمنٹ کی ہدایت دی۔

اجلاس میں بتایا گیا کہ دیہات میں ڈرینج سسٹم کی تعمیر و بحالی اور گلیوں میں ٹف ٹائل لگائی جائیں گی، دیہات کے ہر مرکزی قبرستان میں چار دیواری اور صفائی کا اہتمام کیا جائے گا، دیہات میں پارک اور پلے گراؤنڈ بھی بنائے جائیں گے، ہر گاؤں سائن بورڈ اور گھروں کی نمبر مارکنگ کی جائے گی۔

وزیراعلیٰ مریم نواز کی ہدایت پر دیہات کے جوہڑوں میں بائیوٹیکنالوجی سے صفائی کا پروگرام بنایا گیا ہے، گندے پانی کے جوہڑ میں مخصوص پودے لگانے سے بدبو اور گندگی کا خاتمہ ہوگا، گندے پانی کے جوہڑ میں لگائے گئے مخصوص پودے کی وجہ سے ماحولیاتی آلودگی کا بھی خاتمہ ہوگا، اسپیشل پلانٹ کی جڑیں گندگی جذب کرنے کی صلاحیت رکھتی ہیں۔

اس کے علاوہ اجلاس میں وزیراعلیٰ رورل روڈ بحالی پروگرام کا بھی جائزہ لیا گیا، دیہات کی 4500 کلو میٹر سڑکوں کی تعمیر و بحالی کی تجویز پر اتفاق کیا گیا۔

اس دوران وزیراعلیٰ مریم نوازشریف پروگرام برائے یونین کونسل آفس پر تفصیلی بریفنگ بھی دی گئی اور بتایا گیا کہ عوام کی سہولت کیلئے ہر یونین کونسل میں میٹنگ ہال، کونسل روم اور سیکریٹری آفس بنائے جائیں گے۔

مریم نواز نے کہا کہ تاریخ کا سب سے بڑا پروگرام ستھرا پنجاب کامیابی سے جاری ہے، شہری صوبے کو صاف بنانے کے لئے اپنا فرض بھی نبھائیں۔