دفتر خارجہ کے ترجمان شفقت علی خان نے کہا کہ امریکہ ہماری ایک بڑی برآمدی منزل ہے۔

ترجمان دفتر خارجہ شفقت علی خان نے صحافیوں کو ہفتہ وار بریفنگ دیتے ہوئے کہا کہ ہم نے امریکہ کی جانب سے ٹیرف معطل کرنے کی اطلاعات دیکھی ہیں، اس کے علاوہ سعودی عرب کی جانب سے 14 ممالک کے لیے ویزا معطلی کی رپورٹس دیکھی ہیں، اس حوالے سے متعلقہ حکومت کے ساتھ رابطے میں ہیں۔

ترجمان دفتر خارجہ نے کہاکہ پاکستان کے افغانستان کے ساتھ اہم تعلقات ہیں، حال ہی میں نمائندہ خصوصی کا دورہ کابل کافی اہم رہا، متعدد موضوعات پر تبادلہ خیال ہوا۔

شفقت علی خان کا دوران بریفنگ کہنا تھا کہ ہمارے چین کے ساتھ قریبی دیرینہ تعلقات ہیں، ہم امریکہ کی جانب سے تیز رفتار ٹیرف تبدیلیاں دیکھ رہے ہیں، اس حوالے سے وزیراعظم نے بھی ایک اسٹیرنگ کمیٹی قائم کی ہے، جبکہ امریکہ میں تعلیمی ویزوں کی معطلی کی اطلاعات ہیں، ہم اس حوالے سے امریکہ کے ساتھ رابطے میں ہیں۔

ترجمان دفتر خارجہ نے کہا کہ وزیراعظم پاکستان آج سے بیلاروس کے دو روزہ سرکاری دورے پر روانہ ہو رہے ہیں، بیلاروس کے صدر کی جانب سے وزیراعظم کو دورے کی دعوت دی گئی تھی، وزیر خارجہ اور وزیراعلی پنجاب بھی دورے میں وزیراعظم کے ہمراہ ہوں گے۔

شفقت علی خان کا یہ بھی کہنا تھا کہ دورے کے دوران متعدد معاہدوں پر دستخط کیے جائیں گے، وزیراعظم شہباز شریف بیلاروس کے صدر سے ملاقات کریں گے، ان کا دورہ بیلا روس مسلسل شراکت داری کا عکاس ہے۔

ترجمان دفتر خارجہ نے کہا کہ پاکستان ہمیشہ مشکل وقت میں اپنے افغان بہنوں بھائیوں کے ساتھ کھڑا ہوا ہے، تاہم اپنی سرحدوں کو آزاد اور محفوظ بنانا ہماری پالیسی ہے، حکومت نے آئی ایف آر پی کولا مرحلہ وار نفاذ کر رہی ہے، اس حوالے سے ہم تمام متعلقہ شراکت داروں کے ساتھ رابطے میں ہیں۔

شفقت علی خان کا کہنا تھا کہ ہم یہاں غیر قانونی مقیم ملکیوں کی واپسی پر عملدرآمد کر رہے ہیں، یہ پاکستان کا حق ہے کہ وہ کسی کی اپنی سرحد سے قانونی طور پر آمد کو یقینی بنائے، یہ معاملہ ریگولیشن آف سرحد کا ہے، جبکہ خارجہ پالیسی وفاق کا معاملہ ہے۔

ترجمان دفترخارجہ نے کہا کہ صوبائی حکومت کے افغانستان سے مذاکرات کے ٹی او آرز کا معاملہ افغان ڈیسک سے چیک کریں گے، متحدہ عرب امارات میں بہت بڑا پاکستانی ڈائسپورا رہتا ہے، تاہم پاکستانی ویزوں پر مکمل پابندی نہیں ہے، امریکہ کی جانب سے بگرام میں ائیر بیس قائم کرنے کا معاملہ سوشل میڈیا افواہیں ہیں، تاہم یہ افغانستان اور امریکہ کی حکومتوں کا آپسی معاملہ ہے۔

شفقت علی خان کا یہ بھی کہنا ہے کہ برطانیہ سے پاکستان لاے جانے والے قیدی کی سماجی تقریبات میں شرکت کی اطلاعات کو دیکھیں گے، تہور رانا پر ہمارا ریکارڈ کہتا ہے کہ انہوں نے گزشتہ دو برس سے پاکستانی شہریت کی تجدید نہیں کی، ایران ہمارا ایک اہم ہمسایہ اور قریبی دوست ہے، ہمارے تعلقات انتہائی اہم ہیں۔ جے سی پی او ایک پیچیدہ مسئلے کے حل کی عمدہ مثال ہے۔

ترجمان دفترخارجہ نے کہاکہ ہم تمام مسائل کے بات چیت کے زریعہ حل کے خواہشمند ہیں، چین پاکستان کا تزویراتی اور قریبی شراکت دار ہے، چینی شہریوں کا تحفظ ہماری بنیادی ذمہ داری ہے، وزیر خارجہ اسحاق ڈار11 سے 13 اپریل تک ترکیہ کا دورہ کریں گے، وہ یہ دورہ اناطولیہ ڈپلومیسی فورم کی دعوت پر کر رہے ہیں، اس کے علاوہ ہم میانمار اور تھائی لینڈ سے پاکستانی مغویوں کے معاملے پر رابطہ میں ہیں۔

شفقت علی خان کا کہنا ہے کہ فلسطین میں 50 ہزار سے زائد فلسطینی شہید ہو چکے ہیں، اگر یہ نسل کشی نہیں تو علم نہیں کہ نسل کشی کیا ہوتی ہے، بھارت میں وقف قوانین وہاں مسلمانوں کا بنیادی حق ہے، وقف املاک قوانین میں تبدیلی مسلمانوں کو دیوار کے ساتھ لگانے کی کوشیش ہے، اس حوالے سے بھارتی اقدامات امتیازی سلوک اور اقلیتوں کے حقوق کی خلاف ورزی ہیں۔

ترجمان دفترخارجہ نے مزید یہ بھی کہا کہ افغانستان میں چھوڑے گئے جدید امریکی ہتھیار ہماری سیکیورٹی فورسز پر حملوں میں استعمال ہو رہے ہیں، یہ معاملہ بارہا امریکہ کے ساتھ اٹھایا ہے، نائب وزیراعظم کے امریکی وزیر خارجہ کے ساتھ حالیہ ٹیلیفونک گفتگو میں بھی یہ بات زیربحث آئی، منرل انویسٹمنٹ فورم کے حوالے سے معلومات ایس آئی ایف سی فراہم کر سکتی ہے۔