وزیراعلیٰ سندھ سید مراد علی شاہ نے کراچی میں ہیوی ٹرانسپورٹ وہیکلز کیلئے رفتار کی حد 30 کلومیٹر فی گھنٹہ مقرر کردی ہے۔

 وزیراعلیٰ سندھ سید مراد علی شاہ کی زیر صدارت کراچی میں ٹریفک مسائل سے متعلق اہم اجلاس ہوا۔

اجلاس میں وزیراعلیٰ سندھ سید مراد علی شاہ نے کہا کہ شہر میں بڑھتے ہوئے روڈ حادثات  پر انتہائی افسردہ ہوں، ٹریفک اور ضلع پولیس مل کر کام کرے اور مجھے صرف روڈ حادثات  کی روک تھام  چاہیے۔

سید مراد علی شاہ نے کہا کہ انسانی جانوں کا ضیاع ناقابل برداشت ہے، ماؤں کی گودیں اجڑ رہی ہیں، تمام ہیوی وہیکلز چلانے والوں کے ڈرائیونگ لائسنس چیک کیےجائیں۔

آئی جی پولیس نے اجلاس میں بریفنگ دیتے ہوئے کہا کہ شہر میں 2024 میں 1607065 چالان  ہوئے جس میں 1336 ملین روپے جرمانہ وصول کیا گیا،  ‏‎512190  گاڑیوں کے خلاف کارروائیاں  ہوئیں، 11287 ڈرائیورز حراست میں لیے گئے، مجموعی طور پر 650 ایف آئی آرز درج کیں اور 7555 فٹنس سرٹیفکیٹ منسوخ کیے گئے۔

اجلاس کے دوران وزیراعلیٰ سندھ نے تمام ہیوی ٹرانسپورٹ وہیکلز (HTVs)، لائٹ ٹرانسپورٹ وہیکلز (LTVs) اور پبلک سروس وہیکلز (PSVs) میں ٹریکر اور ڈیش کیم کی تنصیب لازمی قرار دیتے ہوئے کہا کہ تمام بھاری و ہلکی گاڑیوں میں انڈر رن پروٹیکشن ڈیوائسز کی تنصیب لازمی ہے۔

سید مراد علی شاہ نے کہاکہ لیک کرتے یا بفل پلیٹس کے بغیر واٹر ٹینکرز کا سڑکوں پر چلنا ممنوع ہے، فٹنس سرٹیفکیٹ منسوخ گاڑیاں ضبط کی جائیں گی، جبکہ دوبارہ اجازت محکمہ ٹرانسپورٹ سے مشروط ہوگی، جبکہ بھاری و ہلکی گاڑیوں کے ڈرائیورز کے لیے رینڈم ڈرگ ٹیسٹ لازمی قرار دے دیا۔

وزیر اعلیٰ سندھ نے اجلاس میں شفاف ای ٹکٹنگ کے لیے فیس لیس خودکار نظام متعارف کرانے کی ہدایت دیتے ہوئے کہا کہ محکمہ ٹرانسپورٹ، ایکسائز، لائسنسنگ اتھارٹی، ٹریفک پولیس اور نادرا کو باہم منسلک کیا جائے گا۔

سید مراد علی شاہ نے ٹریفک قوانین پر مؤثر اور ہم آہنگ عملدرآمد ممکن بنانے کی ہدایت دی اور کہا کہ ٹریفک انجینئرنگ بیورو کی تنظیمِ نو کی جائے گی اور اسے میئر کراچی کے ماتحت کر دیا جائے گا۔

وزیراعلیٰ سندھ نے ڈرائیونگ لائسنس سے قبل بین الاقوامی معیار کی تربیت لازمی قرار دیتے ہوئے کہا کہ لائسنس ہولڈرز کے لیے ڈی میرٹ پوائنٹ سسٹم متعارف کیا جائے۔

وزیراعلیٰ سندھ نے غیر قانونی نمبر پلیٹس، کالے شیشے، غیر مجاز سائرن و لائٹس کے خلاف کریک ڈاؤن میں تیزی لانے کی ہدایت  دیتے ہوئے ہیلمٹ کے بغیر موٹر سائیکل چلانا، ٹرپل سواری اور غیر محفوظ بائیکس کے خلاف سخت کارروائی کرنے کا حکم دیا۔

سید مراد علی شاہ نے حکم دیا کہ فیصلوں پر فوری عملدرآمد کے لیے اعلیٰ سطحی کمیٹی قائم کی جائے، جبکہ نگرانی آئی جی پولیس خود کریں گے۔

اجلاس میں صوبائی وزراء، سعید غنی، مکیش کمار چاولہ، ضیاء الحسن لنجار، میئر کراچی مرتضیٰ وہاب، آئی جی پولیس غلام نبی میمن، پرنسپل سیکریٹری آغا واصف، سیکریٹری داخلہ اقبال میمن، کمشنر کراچی حسن نقوی، ایڈیشنل آئی جی کراچی جاوید عالم اوڈھو، سیکریٹری ایکسائز سلیم راجپوت، سیکریٹری ٹرانسپورٹ اسد ضامن، ڈی آئی جی ڈرائیونگ  لائسنس اقبال دارا، ڈی آئی جی ٹریفک پیر محمد شاہ سمیت دیگر متعلقہ افسران شریک تھے۔