اسلام آباد: وزیرِ اعظم محمد شہباز شریف کی زیرِ صدارت اقتصادی مشاورتی کونسل کے اجلاس میں وزیر اعظم نے اس بات پر زور دیا کہ پاکستان کی معاشی ترقی کے لئے برآمدات میں اضافہ ضروری ہے۔

وزیرِ اعظم محمد شہباز شریف کی زیرِ صدارت اقتصادی مشاورتی کونسل کا اجلاس منعقد ہوا جس میں پاکستان کی برآمدات میں اضافے کے حوالے سے مشاورت کی گئی اور تجاویز پیش کی گئیں جب کہ اجلاس میں شرکاء نے حکومتی اقدامات پر اظہار اطمینان کیا۔

وزیرِ اعظم نے اجلاس میں کہا کہ پاکستان کی معاشی ترقی کے لیے برآمدات میں اضافہ انتہائی ضروری ہے۔ آئی ایم ایف کے ساتھ مذاکرات کے بعد بجلی کی قیمتوں میں کمی کے معاملے پر حکومت کی اقتصادی ٹیم کو سراہتے ہوئے کہا کہ اس اقدام سے صنعتوں کی پیداواری لاگت میں کمی آئے گی جس کے نتیجے میں اضافی پیداوار اور برآمدات میں اضافہ ہوگا۔

وزیرِ اعظم نے یہ بھی کہا کہ مقامی صنعتوں کی پیداواری لاگت کم ہونے سے پاکستانی مصنوعات کی بین الاقوامی سطح پر مسابقت ممکن ہوسکے گی اور صنعتی ترقی حکومت کی اولین ترجیح ہے۔ صنعتی ترقی سے ملک میں روزگار کے نئے مواقع پیدا ہوں گے جو کہ معیشت کے لیے انتہائی اہم ہے۔

انہوں نے اس عزم کا اظہار کیا کہ شعبے کے ماہرین کی تجاویز سے معیشت میں مزید بہتری لائی جائے گی اور جامع مشاورتی عمل کے ذریعے پائیدار ترقی کے اہداف حاصل کیے جائیں گے۔

وزیرِ اعظم نے انفارمیشن ٹیکنالوجی اور ٹیکس نظام کی ڈیجیٹائیزیشن کی اہمیت پر زور دیتے ہوئے کہا کہ ان اصلاحات سے کاروبار اور سرمایہ کاری میں آسانیاں پیدا کی جا رہی ہیں۔

انہوں نے حکومت کی معاشی ٹیم کی محنت کا بھی اعتراف کیا جو معیشت کے استحکام، مہنگائی کی شرح میں کمی، شرح سود میں کمی، عالمی اداروں کے اعتماد میں اضافہ اور دوست ممالک سے سرمایہ کاری میں مددگار ثابت ہو رہی ہے۔

وزیرِ اعظم نے یہ بھی اعلان کیا کہ امریکہ کے ساتھ تجارتی تعلقات کو مزید فروغ دینے اور ٹیرف پر مذاکرات کے لیے پاکستان کا اعلیٰ سطحی وفد امریکہ بھیجا جائے گا۔ اس وفد میں پاکستان کی معروف کاروباری شخصیات اور برآمد کنندگان شامل ہوں گے۔

انہوں نے مزید کہا کہ اقتصادی مشاورتی کونسل میں شامل شعبے کے ماہرین اپنی مفید تجاویز سے ملکی ترقی میں اہم کردار ادا کریں گے اور پاکستان کی معاشی ترقی کے لیے مزید اقدامات کیے جائیں گے۔