گورنر سندھ کامران خان ٹیسوری کا کہنا ہے کہ ہمارا نظریاتی اور سیاسی اختلاف ہوسکتا ہے، لیکن ریاست پر اختلاف نہیں ہوسکتا کیونکہ ریاست ماں کی طرح ہوتی ہے۔

گورنر سندھ کامران خان ٹیسوری نے اسلام آباد میں منعقد ہونے والے پہلے اوورسیز پاکستانی کنونشن میں بطور مہمانِ خصوصی شرکت کی اور اپنے خطاب میں سمندر پار پاکستانیوں کے کردار، قومی یکجہتی، معیشت کی بہتری، اور ریاستی اداروں کے استحکام پر زور دیا۔

کامران خان ٹیسوری نے وزیر اعظم میاں محمد شہباز شریف اور آرمی چیف جنرل سید عاصم منیر کی کوششوں کو سراہتے ہوئے کہا کہ وزیر اعظم اور آرمی چیف معیشت کے مزید استحکام کے لیے شب و روز محنت کر رہے ہیں۔

انہوں نے کہا کہ معیشت کی بحالی اور سرمایہ کاری کے فروغ کے لیے قائم ایس آئی ایف سی (Special Investment Facilitation Council) ایک مؤثر “ون ونڈو آپریشن” ہے، جہاں سرمایہ کاروں کو مکمل معاونت فراہم کی جا رہی ہے۔

گورنر سندھ نے بیرون ملک مقیم پاکستانیوں سے اپیل کی کہ وہ ملک کی ترقی میں بڑھ چڑھ کر حصہ لیں، انہوں نے کہا کہ اُڑان پاکستان کے تحت قومی معیشت تیزی سے ترقی کر رہی ہے، اوورسیز پاکستانی اس میں اپنا بھرپور حصہ ڈالیں۔

گورنر سندھ نے 77 سالہ قومی تاریخ میں سب سے زیادہ زرمبادلہ وطن بھیجنے پر اوورسیز پاکستانیوں کو خصوصی مبارک باد پیش کی اور ان کی خدمات کو سراہا۔

گورنر سندھ نے اپنے خطاب میں مزید کہا کہ اوورسیز پاکستانی ہماری معیشت کی ریڑھ کی ہڈی ہیں، ان کی قربانیاں اور وطن سے محبت قابلِ تحسین ہے۔