اسلام آباد: وزیراعظم شہباز شریف نے اوورسیز پاکستانی کنونشن سے خطاب کرتے ہوئے کہا ہے کہ اوورسیز پاکستانی ملک کے حقیقی سفیر ہیں اور ان کی سہولت اولین ترجیح ہے۔

وزیراعظم شہباز شریف نے پہلے اوورسیز پاکستانی کنونشن سے خطاب کیا جس دوران انہوں نے کہا ہے کہ ایک کروڑ سے زائد پاکستانی دنیا کے مختلف ممالک میں اپنی محنت، لگن اور قربانیوں کے ذریعے ملک کا نام روشن کر رہے ہیں اور یہ تمام لوگ نہ صرف پاکستان کے سفیر ہیں بلکہ ہماری پہچان اور قوت بھی ہیں۔

وزیراعظم نے کہا کہ بیرون ملک مقیم پاکستانی رزقِ حلال کما کر اپنے خاندان کے ساتھ ساتھ وطنِ عزیز کی معیشت کو بھی مضبوط بنا رہے ہیں۔

انہوں نے اس عزم کا اظہار کیا کہ حکومت ان پاکستانیوں کی سہولت اور مراعات میں کوئی کسر نہیں چھوڑے گی اور ان کے تمام جائز مطالبات پورے کیے جائیں گے۔

دہشت گردی کے خلاف جنگ

وزیراعظم کا کہنا تھا کہ پاکستان نے دہشت گردی کے خلاف جنگ میں 80 ہزار سے زائد قیمتی جانوں کی قربانی دی ہے۔ 2018 تک ملک میں دہشت گردی کا مکمل خاتمہ کردیا گیا تھا تاہم ماضی کی حکومت کی ناقص پالیسیوں کے باعث یہ ناسور دوبارہ سر اٹھانے لگا۔

وزیراعظم نے واضح کیا کہ پاکستان کا دفاع محفوظ ہاتھوں میں ہے اور ہماری افواج قوم کے مستقبل کو محفوظ بنانے کے لیے اپنی جانوں کے نذرانے پیش کر رہی ہیں۔

عدالتی و انتظامی اصلاحات برائے اوورسیز پاکستانی

وزیراعظم نے اوورسیز پاکستانیوں کے قانونی مسائل کے حل کے لیے کئی اقدامات کا اعلان کیا۔ ان میں اسلام آباد میں خصوصی عدالتوں کا قیام، پنجاب میں عمل درآمد کا آغاز اور سندھ، بلوچستان، خیبرپختونخوا اور دیگر علاقوں کی اعلیٰ عدلیہ سے تعاون کی درخواست شامل ہے۔

وزیراعظم نے ویڈیو لنک کے ذریعے شواہد کی ای ریکارڈنگ، مقدمات کی ای فائلنگ اور 60 دن میں ای فائلنگ کی مکمل سہولت دینے کا وعدہ کیا۔

قانونی و تعلیمی مراعات

وزیراعظم نے جعلی مقدمات سے بچاؤ کے لیے سول کورٹس کے طریقہ کار میں اصلاحات کا اعلان کیا جب کہ ساتھ ہی انہوں نے بیرون ملک مقیم پاکستانیوں کے بچوں کے لیے میڈیکل کالجز میں 15 فیصد کوٹہ مختص کرنے اور نیوٹیک کے ذریعے بچوں کو ہنرمند بنانے کے کورسز کروانے کا اعلان کیا۔

اوورسیز خواتین کو ملازمتوں میں عمر کی رعایت بھی 5 سے بڑھا کر 7 سال کردی گئی ہے جب کہ ایف بی آر انہیں فائلرز کے طور پر شمار کرے گا تاکہ ان کے لین دین اور بینکنگ کے معاملات سہل بنائے جاسکیں۔

ترسیلات زر اور معیشت میں کردار

وزیراعظم نے بتایا کہ صرف مارچ 2025 تک بیرون ملک پاکستانیوں نے 4 ارب 10 کروڑ ڈالر کی ترسیلات زر ملک بھیجی ہیں جو ان کی محبت، خلوص اور اعتماد کا منہ بولتا ثبوت ہے۔

انہوں نے کہا کہ اسلام آباد، پنجاب اور بلوچستان کے بورڈ آف ریونیو میں اوورسیز پاکستانیوں کے لیے خصوصی دفاتر قائم کیے گئے ہیں جب کہ خیبرپختونخوا، سندھ، آزاد کشمیر اور گلگت بلتستان میں بھی ایسے دفاتر قائم کیے جائیں گے۔

بین الاقوامی سطح پر مؤقف اور حمایت

وزیراعظم نے خطاب میں مسئلہ کشمیر اور فلسطین پر پاکستان کے دو ٹوک مؤقف کا اعادہ کرتے ہوئے کہا کہ کشمیر پاکستان کی شہ رگ ہے اور کشمیری عوام کو ان کے حقِ خود ارادیت کے حصول تک سیاسی، اخلاقی اور سفارتی حمایت جاری رہے گی۔

وزیراعظم نے غزہ میں شہید ہونے والے پچاس ہزار معصوموں پر شدید دکھ کا اظہار کرتے ہوئے عالمی برادری سے فوری جنگ بندی کا مطالبہ کیا۔

میرپور میں ایئرپورٹ بنانے کا اعلان

وزیراعظم نے آزاد کشمیر کے شہر میرپور میں ایئرپورٹ بنانے کا اعلان بھی کیا۔ لندن میں واقع پاکستانی ہائی کمیشن میں آن لائن سیل ڈیڈ رجسٹریشن کی سہولت فراہم کرنے کا اعلان بھی ان کے خطاب کا اہم حصہ تھا۔

وزیراعظم نے کہا کہ بیرون ملک مقیم پاکستانی ملک دشمن عناصر کی منفی مہم کے خلاف اپنا کردار ادا کریں کیونکہ وہی پاکستان کے اصل اور سچے ترجمان ہیں۔