وفاقی وزیراطلاعات عطاءاللہ تارڑ نے کہا کہ پاکستان کے پاس  مستند انٹیلی جنس اطلاعات ہیں کہ  بھارت اگلے 24-36 گھنٹوں میں  پہلگام واقعہ  سے جڑے بے بنیاد اور خود ساختہ الزامات کو بنیاد بنا کر پاکستان کے خلاف فوجی کارروائی کرنے کا ارادہ رکھتا ہے۔

وفاقی وزیراطلاعات عطاتارڑ نے موجودہ صورتحال پر اہم گفتگو کرتے ہوئے کہا کہ پاکستان، بھارت کا خطے میں جج، جیوری اور جلاد کا خود ساختہ کردار سختی سے مسترد کرتا ہے۔

انہوں نے کہا کہ  پاکستان خود دو دہائیوں سے  دہشتگردی کا شکار رہا ہے اور دُنیا میں کسی بھی شکل میں دہشتگردی کی سخت مذمت کرتا ہے، پہلگام حملے کے بعد پاکستان نے ذمہ دار ریاست ہونے کے ناطے سچائی کا   پتہ لگانے  اور اس  کے محرکات جاننے کے لیے کھلے دل سے آزادانہ اور غیر جانبدار انہ تحقیقات کی پیشکش کی۔

یہ بھی پڑھیں: پہلگام واقعہ “فالس فلیگ” قرار، بھارتی عوام مودی حکومت کے خلاف کھڑی ہونے لگی

عطاتارڑ کا یہ بھی کہنا ہے کہ بدقسمتی سے بھارت نے غیر معقولیت اور تصادم کے راستے پر چلنے کا انتخاب کیا جو کہ خطے  اور دنیا میں تباہ کن نتائج کا باعث ہو گا، غیر جانبدارانہ تحقیقات سے فرار  بذات خود بھارت کے اصل مقاصد کو بے نقاب کرنے کے لیے بڑا ثبوت ہے۔

انہوں نے کہا کہ  سیاسی مقاصد کے حصول کے لیے جان بوجھ کر عوامی جذبات کو بھڑکا کر اس طرح فیصلے کرنا بدقسمت اور افسوسناک ہے، پاکستان اس بات کا  واضح اعادہ کرتا ہے کہ بھارت کی طرف سے کسی بھی قسم کی فوجی مہم جوئی کا یقینی اور فیصلہ کن جواب دیا جائے گا۔

وفاقی وزیراطلاعات نے مزید یہ بھی کہاکہ بین الاقوامی برادری کو  یہ سمجھنے کی ضرورت ہے کہ جنگ سے ہونے والے تباہ کن نتائج کی ذمہ داری  صرف اور صرف بھارت پر عائد ہو گی، پاکستانی قوم اپنی خودمختاری اور علاقائی سالمیت کا ہر قیمت پر دفاع کرے گی۔