پوپ فرانسس کے انتقال کے بعد ویٹی کن میں نئے روحانی پیشوا کے انتخاب کی تیاریاں جاری ہیں، اور اس موقع پر ایک پاکستانی شخصیت، کارڈینل جوزف کوٹس، عالمی سطح پر نمایاں توجہ حاصل کر رہے ہیں۔

اگر وہ منتخب ہو جاتے ہیں، تو وہ نہ صرف پہلے پاکستانی پوپ ہوں گے بلکہ جنوبی ایشیا کے چند نمایاں امیدواروں میں بھی شمار کیے جائیں گے جو ایک تاریخی پیش رفت ہوگی۔

ابتدائی زندگی اور تعلیم

کارڈینل کوٹس 21 جولائی 1945 کو امرتسر، برٹش انڈیا میں پیدا ہوئے۔ ان کے والد پیڈرو جوزے کوٹو کا تعلق گووا سے تھا۔

تقسیم کے بعد ان کا خاندان لاہور منتقل ہوگیا جہاں انہوں نے ابتدائی تعلیم سینٹ انتھونی ہائی اسکول سے حاصل کی اور بعد ازاں کرائسٹ دی کنگ سیمنری، کراچی میں مذہبی تعلیم حاصل کی۔

وہ 9 جنوری 1971 کو کیتھولک پریسٹ مقرر ہوئے اور بعد میں روم کی پونٹیفکل اربن یونیورسٹی سے اعلیٰ تعلیم حاصل کی۔

مذہبی خدمات اور قیادت

کارڈینل کوٹس نے اپنی مذہبی خدمات کا آغاز تدریس، روحانی قیادت اور فلسفہ و الٰہیات کی تعلیم سے کیا۔ وہ کیتھولک اداروں میں مشنری پادری اور رہنما کے طور پر بھی فعال رہے۔

1988 میں انہیں فیصل آباد کا بشپ مقرر کیا گیا جب کہ 2012 میں وہ آرچ بشپ آف کراچی کے عہدے پر فائز ہوئے جو پاکستان کا سب سے بڑا آرچ ڈایوسس ہے۔

کارڈینل کا درجہ

28 جون 2018 کو پوپ فرانسس نے انہیں کارڈینل کے مقدس رتبے پر فائز کیا جو ان کی عالمی سطح پر مذہبی قیادت کا اعتراف تھا۔

بین المذاہب ہم آہنگی میں کردار

انہوں نے ہمیشہ بین المذاہب مکالمے، مذہبی رواداری اور اقلیتوں کے حقوق کے لیے آواز بلند کی۔ ان کی قیادت میں امن پر مبنی کئی کانفرنسز ہوئیں اور وہ نیشنل کمیشن فار انٹرفیتھ ڈائیلاگ کا حصہ بھی رہے۔

عالمی سطح پر پذیرائی

28 جون 2018 کو پوپ فرانسس نے انہیں کارڈینل کے مقدس رتبے پر فائز کیا جو ان کی عالمی سطح پر خدمات کا اعتراف تھا۔ انہوں نے متعدد بین الاقوامی فورمز پر پاکستان کی نمائندگی کی اور ایشیا و مشرق وسطیٰ میں امن کے پیغام کو عام کیا۔

قومی اعزازات

کارڈینل کوٹس کی خدمات کے اعتراف میں حکومت پاکستان نے 14 اگست 2024 کو انہیں ہلالِ امتیاز سے نوازا۔ بعد ازاں 23 مارچ 2025 کو یومِ پاکستان کی تقریب میں گورنر سندھ کی جانب سے انہیں تعریفی شیلڈ بھی پیش کی گئی۔

پوپ کے ممکنہ انتخاب میں نمایاں امیدوار

موجودہ صورتحال میں کارڈینل کوٹس کو ایک بین الاقوامی وژن رکھنے والا، ہم آہنگی پسند اور تجربہ کار مذہبی رہنما کے طور پر دیکھا جا رہا ہے۔

ان کی شخصیت مشرق و مغرب کے درمیان روحانی پُل کا کردار ادا کرسکتی ہے اور ان کی قیادت عالمی یکجہتی کی علامت بن سکتی ہے۔