پاکستان اسٹاک ایکسچینج میں کاروباری ہفتے کے آخری روز ایک اور نئی تاریخ رقم ہو گئی، پہلی بار انڈیکس 1 لاکھ 20 ہزار کی سطح عبور کرگیا۔

پاکستان اسٹاک ایکسچینج میں آج کاروبار میں نہایت مثبت رجحان رہا اور 100 انڈیکس نئی بلندی کو چھو گیا۔

گزشتہ روز وزیر اعظم کی جانب سے بجلی کی قیمت میں کمی کے بعد آج اسٹاک ایکسچینج میں دن کے آغاز کے ساتھ ہی تیزی کا رجحان رہا، دوران ٹریڈنگ بازارِ حصص کا 100 انڈیکس 1 ہزار 816 پوائنٹس کے اضافے سے 1 لاکھ 20 ہزار 754 پر آ گیا، آج اب تک کے کاروبار کے دوران انڈیکس 1 لاکھ 20 ہزار 796 پوائنٹس کی بلندی پر بھی پہنچا۔

واضح رہے کہ گزشتہ روز کاروبار کے اختتام پر انڈیکس 1 لاکھ 18 ہزار 938 پوائنٹس پر بند ہوا تھا۔

وزیراعظم کا اظہار اطمینان

وزیراعظم محمد شہباز شریف نے  پاکستان اسٹاک ایکسچینج میں ایک ہی دن میں 1800 پوائنٹس  بڑھنے اور  120،000 کی نئی بلند ترین سطح عبور کرنے کی  پر اطمینان کا اظہار کیا ہے۔

اس موقع پر وزیراعظم نے کہا کہ پاکستان اسٹاک ایکسچینج میں کاروبار کی مثبت سمت حکومت کی معاشی پالیسیوں پر تاجروں اور سرمایہ کاروں کے بڑھتے ہوئے اعتماد کی عکاسی کرتی ہے۔

محمد شہباز شریف کا کہنا ہے کہ بجلی کی نرخوں میں ایک بڑی  کمی کی گئی ہے جس سے نا صرف گھریلو صارفین کو ریلیف ملے گا بلکہ یہ کاروباری برادری اور صنعتوں کے لئے بھی خوش آئند ہے۔

وزیراعظم نے کہا کہ گزشتہ ایک سال کے دوران معاشی اشاریوں اور کاروباری ماحول میں بہتری حکومت کی معاشی پالیسیوں کی وجہ سے ممکن ہوئی ہے، حکومت ملک میں کاروبار اور سرمایہ کاری کے لئے مثبت ماحول فراہم کرنے کے لئے ترجیحی بنیادوں پر تمام سہولتیں فراہم کررہی ہے۔