اسپیکر قومی اسمبلی سردار ایاز صادق نے وزیراعظم شہباز شریف کی جانب سے بجلی کی قیمتوں میں کمی کے فیصلے کا خیرمقدم کرتے ہوئے اسے عوام کے لیے ایک تاریخی ریلیف قرار دیا ہے۔

انہوں نے کہا کہ گھریلو صارفین کے لیے 7 روپے 41 پیسے فی یونٹ اور صنعتی صارفین کے لیے 7 روپے 58 پیسے فی یونٹ کمی ایک غیر معمولی ریلیف ہے۔

اسپیکر نے اس فیصلے کو وزیراعظم اور ان کی ٹیم کا تاریخی عوامی فیصلہ قرار دیتے ہوئے کہا کہ اس فیصلے سے تمام صارفین کو بلا امتیاز فائدہ پہنچے گا۔

انہوں نے مزید کہا کہ ملک کو معاشی بھنور سے نکالنے کے بعد عوام کو اتنا بڑا ریلیف ایک تاریخ ساز اقدام ہے۔

سردار ایاز صادق نے وزیراعظم کے اس فیصلے کو ملک میں معاشی سرگرمیوں کی تیز رفتاری کی سمت میں اہم قدم قرار دیا اور کہا کہ وزیراعظم کے فیصلے سے ملک میں اب معاشی سرگرمیوں میں مزید تیزی آئے گی۔

اس فیصلے کی اہمیت پر بات کرتے ہوئے اسپیکر قومی اسمبلی نے کہا کہ حکومت کے اس فیصلے سے اسٹاک مارکیٹ میں بھی فوری بہتری آئی ہے، جو کاروباری طبقے کے اعتماد کی عکاس ہے۔

انہوں نے مزید کہا کہ عوامی حلقوں سمیت کاروباری طبقات اور بزنس کمیونٹی نے بھی اس فیصلے کا خیرمقدم کیا ہے۔

ان کا کہنا تھا کہ ملک کو درپیش چیلنجوں کے باوجود اتنا بڑا ریلیف وزیراعظم کے عوام سے کیے گئے وعدوں کی تکمیل ہے۔

سردار ایاز صادق کے مطابق بجلی کی قیمتوں میں کمی سے برآمدات میں اضافہ اور شرح نمو بڑھے گی، جس سے ملک کی معیشت میں مزید بہتری آئے گی۔