راولپنڈی: آرمی چیف جنرل سید عاصم منیر کی زیر صدارت 268 ویں کور کمانڈر کانفرنس میں ہر قیمت پر بلاتفریق دہشت گردی کو ختم کرنے کےعزم کا اعادہ کیا گیا ہے۔

پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل سید عاصم منیر، نشانِ امتیاز (ملٹری) کی زیر صدارت 268 ویں کور کمانڈر کانفرنس منعقد ہوئی جس میں ملک کی داخلی اور خارجی سلامتی کی صورت حال کا تفصیلی جائزہ لیا گیا۔

آئی ایس پی آر نے بتایا کہ کانفرنس کے آغاز میں فورم نے شہداء کے ایصال و ثواب کے لیے فاتحہ خوانی کی۔ شرکاء نے مادرِ وطن کے امن و استحکام کے لیے شہدائے افواجِ پاکستان، قانون نافذ کرنے والے اداروں اور شہریوں کی لازوال قربانیوں کو خراجِ عقیدت پیش کیا۔

ترجمان پاک فوج کا کہنا ہے کہ کانفرنس میں شرکاء کو خطے کی موجودہ صورتحال، قومی سلامتی کو درپیش چیلنجز اور بڑھتے ہوئے خطرات کے جواب میں پاکستان کی حکمتِ عملی کے بارے میں جامع بریفنگ دی گئی۔

دہشت گردی کے خلاف عزم

فورم نے ہر قیمت پر بلاتفریق دہشت گردی کو ختم کرنے کے عزم کا اعادہ کیا اور واضح کیا کہ پاکستان کو غیر مستحکم کرنے کی کوشش کرنے والے ملک دشمن عناصر، ان کے سہولت کاروں اور حوصلہ افزائی کرنے والوں کے خلاف ریاست پوری طاقت سے نمٹے گی۔

شرکاء نے اس بات کا بھی اعادہ کیا کہ کسی کو بھی بلوچستان میں امن خراب کرنے کی اجازت نہیں دی جائے گی۔ بلوچستان کے استحکام اور خوشحالی میں خلل ڈالنے والے عناصر کو عوام کی غیر متزلزل حمایت سے ناکام بنایا جائے گا۔

نیشنل ایکشن پلان اور “عزمِ استحکام” حکمتِ عملی

فورم نے نیشنل ایکشن پلان کے دائرہ کار کے تحت “عزمِ استحکام” کی حکمتِ عملی کے تیز اور مؤثر نفاذ کی ضرورت پر زور دیا اور دہشت گردی کے خلاف پوری قوم کے تعاون سے مشترکہ نقطۂ نظر کی اہمیت کو اجاگر کیا۔

شرکاء نے اس بات پر زور دیا کہ ریاستی ادارے آئین کے دائرے میں رہتے ہوئے قانون پر پوری استقامت سے عمل درآمد کریں گے اور اس میں کسی قسم کی نرمی اور کوتاہی نہیں برتی جائے گی۔

آرمی چیف کا بیان

آرمی چیف نے ملک بھر میں نیشنل ایکشن پلان کے تحت قائم ضلعی رابطہ کمیٹیوں کے آغاز کو سراہا اور اس کے تیز نفاذ پر زور دیا۔ انہوں نے کہا کہ تمام ادارے پائیدار ہم آہنگی، مربوط کوششوں اور تعاون کو یقینی بنائیں گے۔

آرمی چیف نے دہشت گردوں کی مالی اعانت کے خلاف سخت قانونی اقدامات میں مکمل تعاون فراہم کرنے کا عزم ظاہر کیا۔

انہوں نے کہا کہ غیر قانونی سرگرمیاں دہشت گردی کی مالی معاونت سے جڑی ہوئی ہیں اور پاکستان میں دہشت گردوں اور ان کے سہولت کاروں کے لیے کوئی جگہ نہیں ہے۔

بھارت اور مقبوضہ کشمیر کی صورتحال

فورم نے بھارت کے غیر قانونی طور پر مقبوضہ جموں و کشمیر میں جاری انسانی حقوق کی سنگین خلاف ورزیوں پر گہری تشویش کا اظہار کیا۔

کانفرنس میں لائن آف کنٹرول پر بھارتی فوج کی بلا اشتعال جنگ بندی کی خلاف ورزیوں پر بھی خدشات ظاہر کیے گئے جب کہ شرکاء نے کشمیری عوام کے منصفانہ حقوق کے لیے پاکستان کی پُر زور اور غیر متزلزل حمایت کا اعادہ کیا۔

فلسطین کی حمایت

شرکاء کانفرنس نے فلسطین کے عوام کے ساتھ مکمل یکجہتی کا اظہار کیا اور غزہ میں ہونے والی سنگین انسانی حقوق کی خلاف ورزیوں اور جنگی جرائم کی شدید مذمت کی۔ فورم نے فلسطین کے عوام کی سفارتی، سیاسی اور اخلاقی حمایت فراہم کرنے کا اعادہ کیا۔

کانفرنس کے اختتام پر آرمی چیف نے فیلڈ کمانڈرز کو آپریشنل تیاری اور پیشہ ورانہ مہارت کے اعلیٰ ترین معیارات کو برقرار رکھنے کی ہدایت کی۔ انہوں نے جنگی تیاریوں کو برقرار رکھنے کے لیے سخت تربیت کو یقینی بنانے پر بھی زور دیا۔