اسلام آباد: آئل اینڈ گیس ڈویلپمنٹ کمپنی لمیٹڈ (او جی ڈی سی ایل) نے صوبہ سندھ کے ضلع سانگھڑ میں واقع سنجھورو بلاک کے چک 2-2 کنویں سے پیداوار بحال کردی.

او جی ڈی سی ایل کے ترجمان کے مطابق جدید ٹیکنالوجی کے استعمال سے تیل و گیس کی پیداوار میں نمایاں اضافہ ممکن ہوا ہے جو توانائی کے شعبے میں ایک بڑی پیشرفت ہے۔

او جی ڈی سی ایل نے بتایا کہ چک 2-2 کنویں سے یومیہ 115 بیرل خام تیل، 70 لاکھ مکعب فٹ گیس اور 21 میٹرک ٹن ایل پی جی حاصل ہو رہی ہے۔

ترجمان کا کہنا ہے کہ اس کنویں سے حاصل شدہ گیس کو ایس ایس جی سی ایل نیٹ ورک میں شامل کر دیا گیا ہے جس سے مقامی سطح پر گیس کی دستیابی میں بہتری آئے گی۔

ترجمان کے مطابق او جی ڈی سی ایل بطور آپریٹر چک 2-2 کنویں میں62.50  فیصد کی حصہ دار ہے جبکہ جی ایچ پی ایل 22.50 فیصد اور اورینٹ پیٹرولیم 15 فیصد کی شراکت دار ہیں۔

ترجمان نے کہا کہ اس منصوبے کی بحالی اور پیداوار میں اضافہ توانائی کے شعبے میں ایک اور سنگ میل ثابت ہوگا جو ملک میں تیل و گیس کی بڑھتی ہوئی ضروریات کو پورا کرنے میں معاون ثابت ہوگا۔

او جی ڈی سی ایل کا مزید کہنا ہے کہ کمپنی جدید تکنیکی مہارتوں کو بروئے کار لا کر تیل و گیس کی تلاش اور پیداوار میں مزید اضافے کے لیے پُرعزم ہے۔