کراچی: پاک بحریہ کے بیڑے میں چوتھے آف شور پیٹرول ویسل پی این ایس یمامہ کی شمولیت ہوگئی۔

پاک بحریہ کی دفاعی صلاحیت میں مزید اضافہ ہوگیا ہے، جناح نیول بیس اورماڑہ میں ہونے والی ایک پُروقار تقریب کے دوران جدید آف شور پیٹرول ویسل ’’پی این ایس یمامہ‘‘ کو بحری بیڑے میں باقاعدہ طور پر شامل کرلیا گیا۔

تقریب میں اعلیٰ عسکری و سول حکام، معززین اور پاک بحریہ کے افسران نے شرکت کی جب کہ تقریب کے مہمانِ خصوصی چیف آف دی نیول اسٹاف ایڈمرل نوید اشرف تھے۔

اس موقع پر چیف آف دی نیول اسٹاف نے خطاب کرتے ہوئے بحرِ ہند کی جیو اسٹریٹیجک صورتحال اور پاکستان کو درپیش روایتی و غیر روایتی خطرات کا حوالہ دیتے ہوئے کہا کہ مضبوط اور جدید بحری قوت وقت کی اہم ضرورت ہے۔

پی این ایس یمامہ رومانیہ کے دامن شپ یارڈ میں تیار کیا گیا ایک جدید اور کثیرالمقاصد جنگی جہاز ہے جو اسٹیلتھ ٹیکنالوجی، جدید کمانڈ اینڈ کنٹرول سسٹم اور اعلیٰ معیار کے ہتھیاروں اور سینسرز سے لیس ہے۔ یہ جہاز پاک بحریہ کے اس سیریز کا چوتھا یونٹ ہے۔

اس موقع پر ایڈمرل نوید اشرف نے کہا کہ پی این ایس یمامہ کی شمولیت سے نہ صرف پاکستان نیوی کی سمندری حدود کے دفاع کی صلاحیت میں اضافہ ہوگا بلکہ بحری تجارتی راستوں کے تحفظ اور سمندری امن و استحکام کو فروغ دینے میں بھی مدد ملے گی۔

انہوں نے دامن شپ یارڈ اور منصوبے پر کام کرنے والی تمام ٹیم کی کاوشوں کو سراہتے ہوئے کہا کہ یہ جہاز پاکستان اور رومانیہ کے درمیان دوستانہ تعلقات کا عملی مظہر ہے۔