کراچی: اپوزیشن لیڈر سندھ اسمبلی علی خورشیدی نے شہر قائد میں پانی کی سنگین قلت پر شدید تشویش کا اظہار کرتے ہوئے سندھ حکومت کو سخت تنقید کا نشانہ بنایا ہے۔

ایم کیو ایم پاکستان کے رہنما اور سندھ اسمبلی میں اپوزیشن لیڈر علی خورشیدی کا کہنا ہے کہ 17 سال سے برسرِ اقتدار پیپلز پارٹی نے کراچی کے شہریوں کو پانی کی ایک بوند بھی نہیں دی۔

علی خورشیدی نے کہا کہ کوئی جیالوں کو سمجھائے کہ پریس کانفرنسوں سے شہریوں کے گھروں میں پانی نہیں آتا۔ پانی کی قلت نے ٹینکر مافیا کو بے لگام کردیا ہے اور شہریوں کی زندگیاں داؤ پر لگ چکی ہیں۔

اپوزیشن لیڈر کا کہنا تھا کہ پانی کے لیے ترستے عوام ٹینکرز کے نیچے کچلے جارہے ہیں مگر سندھ حکومت خوابِ غفلت میں ہے، یہ بحران مصنوعی نہیں بلکہ حکومتی نااہلی اور بدانتظامی کا نتیجہ ہے۔

انہوں نے کہا کہ سندھ حکومت نے کراچی کو کربلا بنادیا ہے، جہاں نہ صرف پانی ناپید ہے بلکہ عوام کی جان و مال کا تحفظ بھی ممکن نہیں رہا۔

اپوزیشن لیڈر نے پانی جیسی بنیادی سہولت کی عدم فراہمی کو حکومتی ناکامی قرار دیا اور کہا کہ سندھ حکومت نے کراچی کو بے یار و مددگار چھوڑ دیا ہے۔

علی خورشیدی کا مطالبہ تھا کہ فوری طور پر کراچی کے پانی کے بحران پر قابو پایا جائے اور شہریوں کو ان کا بنیادی حق فراہم کیا جائے۔