وزیر خزانہ محمد اورنگزیب نے کہا کہ آئی ایم ایف پروگرام درحقیقت پاکستان کا پروگرام ہے، ہمیں آئی ایم ایف پروگرام کی ضرورت ہے۔

وفاقی وزیر خزانہ محمد اورنگزیب نے پریس کانفرنس کرتے ہوئے کہا کہ ماضی میں مشکل فیصلے نہیں کیے گئے، ملکی معیشت درست سمت میں گامزن ہو چکی ہے، بیرون ملک سے ترسیلات زر میں اضافہ ہو رہا ہے، اگر یہی صورت حال رہی تو ترسیلات زر 36 ارب ڈالر سالانہ کی سطح پر پہنچ سکتی ہیں۔

وزیر خزانہ کا کہنا ہے کہ مقامی ایل سی کھولنے اور ایکسپورٹس کے لیے یہ بہت اہمیت کا حامل ہے، معاشی استحکام کو اب پائیدار ترقی میں بدلنا ہے، افراد زر کی شرح میں کمی سے ملکی معیشت پر مثبت اثرات مرتب ہوتے ہیں، ہماری ذمہ داری ہے ہے کہ افراط زر کی شرح میں کمی کا فائدہ عوام کو منتقل ہو۔

محمد اورنگزیب نے کہا کہ 51  بنیادی ضرورت کی اشیاء کی قیمتوں پر کڑی نظر ہے، 51  بنیادی اشیاء میں سے 36 کی قیمتیں قدرے مستحکم ہیں، مارک اپ کی شرح 12 فیصد ہونے سے صنعتوں کو فائدہ ہو رہا ہے، میرے ذاتی خیال میں شرح سود میں کمی کی مزید گنجائش موجود ہے۔

وزیر خزانہ کا یہ بھی کہنا تھا کہ نئے سرمایہ کاروں کا اسٹاک مارکیٹ میں آنا انتہائی اہم ہے، عیدالفطر پر معاشی سرگرمیوں کے حوالے سے سروے کروا گیا، عید پر 870 ارب روپے کی معاشی سرگرمیاں دیکھی گئیں، عید پر معاشی سرگرمیوں میں اضافہ قوت خرید کے حوالے سے مثبت اشارہ کرتا ہے۔

محمد اورنگزیب نے کہا کہ افراط زر کی شرح میں مسلسل کمی آ رہی ہے، بین الاقوامی مالیاتی فنڈ کے ساتھ اسٹاف لیول معاہدہ تمام بنچ مارکس پورے ہونے پر ہوا، اسٹرکچرل بینک مارکس میں وہ کچھ بھی ہوا جو پہلے کبھی ملکی تاریخ میں نہیں ہوا، حکومت سب کو ساتھ لے کر چلنا چاہتی ہے، معاشی استحکام اور میکرو استحکام ملک میں پہلے بھی آ چکا ہے، موجودہ آئی ایم ایف پروگرام اسی وقت آخری پروگرام بن سکتا ہے جب ہم مشکل پالیسی فیصلے کریں۔

وزیر خزانہ کا کہنا تھا کہ ٹیکس بیس بڑھانے کے حوالے سے ہم درست سمت میں جا رہے ہیں، نئے ٹیکس فائلرز کی تعداد میں اضافہ ہوا ہے، مستقبل میں سب اپنے گھر سے بیٹھ کر ٹیکس فائل کریں گے، ٹیکنالوجی کے استعمال سے ٹیکس فائلنگ کا نظام آسان اور شفاف بنائیں گے، جون 2024 سے آج تک بجلی کا ٹیرف کم ہونا بڑی بات ہے۔

وفاقی وزیر خزانہ محمد اورنگزیب اسٹرکچرل ریفارمز پر وزیر توانائی کو خراج تحسین پیش کیا اور کہا کہ نئے ٹیکس فائلرز سے 105 ارب روپے وصول ہوئے، ملک میں گاڑیوں اور موٹرسائیکلز کی فروخت میں اضافہ ہوا، حکومت ٹیکس نیٹ کو بڑھا رہی ہے، ٹیکس ٹو جی ڈی پی تناسب 10.6 فیصد ہے، آئندہ 3 برس میں ٹیکس ٹو جی ڈی پی شرح 13 فیصد تک لے جائیں گے۔

محمد اورنگزیب نے کہا کہ آئی ایم ایف وفد یا مشن اس وقت پاکستان میں نہیں، ایف بی آر کا کام صرف ٹیکس جمع کرنا ہے، رواں مالی سال ٹیکس وصولی میں ساڑھے 32 فیصد اضافہ ہوا ہے، آئی ایم ایف سے 1 ارب ڈالر مرحلہ وار وصول ہوں گے، چینی حکام کے ساتھ بات چیت مثبت رہی۔

وفاقی وزیر خزانہ نے مزید یہ بھی کہاکہ امریکہ پاکستان کا اہم اسٹریٹیجک اور سب سے بڑا تجارتی پارٹنر ہے، وزیراعظم نے ٹیرف کے حوالے سے اہم کمیٹی قائم کی ہے،  ہم ٹیرف کے معاملے کو چیلنج اور مواقع دونوں کی حیثیت سے دیکھ رہے ہیں، ٹیرف کے معاملے پر کمیٹی چند روز میں سفارشات وزیراعظم کو پیش کر دے گی، پاکستان اپنا موقف پیش کرنے کے لیے وفد واشنگٹن بھیجے گا۔