اسلام آباد: وزیراعظم محمد شہباز شریف نے کہا ہے کہ امریکی کمپنیوں کو پاکستان کے معدنیات کے شعبے میں سرمایہ کاری کے مواقع سے مستفید ہونا چاہیے۔

وزیراعظم شہباز شریف سے ایرک میئر کی قیادت میں امریکی وفد کی ملاقات ہوئی، اس دوران وزیراعظم نے پاکستان منرلز انوسٹمنٹ فورم میں امریکی شرکت کا خیرمقدم کیا۔

 اس موقع پر وزیراعظم نے گفتگو کرتے ہوئے کہا کہ پاکستان کے معدنیات کے شعبے میں وسیع استعداد موجود ہے، امریکی کمپنیوں کو اس ترجیحی شعبے میں سرمایہ کاری کے مواقع سے مستفید ہونا چاہیے۔

وزیراعظم نے دوطرفہ تناظر اور علاقائی امن و سلامتی کے حوالے سے پاکستان اور امریکہ کے تعلقات کی اہمیت کو اجاگر کیا اور امریکہ کے ساتھ دوطرفہ تعلقات کو مضبوط بنانے کے لیے صدر ٹرمپ اور ان کی انتظامیہ کے ساتھ مل کر کام کرنے کی پاکستان کی خواہش کا بھی اظہار کیا۔

 ملاقات میں وزیر اعظم نے تجارت اور سرمایہ کاری، انسداد دہشت گردی سمیت باہمی دلچسپی کے شعبوں میں تعاون بڑھانے کی اہمیت پر بھی زور دیا۔

 دوسری جانب قائم مقام اسسٹنٹ سیکریٹری میئر نے پاکستان منرل انویسٹمنٹ فورم کے کامیاب انعقاد پر پاکستان کو مبارکباد دی اور پاکستان کے معدنیات کے شعبے کی وسیع استعداد کا اعتراف کیا۔

 اس موقع پر امریکی کمپنیوں کی جانب سے شعبے میں سرمایہ کاری میں دلچسپی سے بھی آگاہ کیا گیا۔

امریکی وفد نے مشترکہ دلچسپی کے امور پر پاکستان کے ساتھ کام کرنے کی امریکی خواہش کا اظہار کیا اور کہا کہ امریکہ پاکستان کے ساتھ دوطرفہ تعلقات کے مزید فروغ کا خواہاں ہے۔